លោក Ahed Bseiso រដ្ឋមន្ត្រីក្រសួងសាធារណការ និងលំនៅឋានប៉ាឡេស្ទីន បាននិយាយកាលពីថ្ងៃព្រហស្បតិ៍ថា ការបោសសម្អាតកម្ទេចថ្ម នៅតំបន់ហ្កាហ្សា បន្ទាប់ពីជម្លោះជាមួយអ៊ីស្រាអែល អាចចំណាយពេលពី ៣ ទៅ ៥ ឆ្នាំ ប្រសិនបើមានថវិកា និងឧបករណ៍គ្រប់គ្រាន់។

លោក Bseiso បានប្រាប់ទីភ្នាក់ងារសារព័ត៌មានប៉ាឡេស្ទីន (WAFA) ថា ពេលវេលាអាស្រ័យលើការធានាធនធាន ការផ្តល់មូលនិធិ និងឧបករណ៍ឯកទេសសម្រាប់កំណត់ទីតាំងគ្រឿងផ្ទុះ និងការដឹកជញ្ជូន និងការកែច្នៃកម្ទេចកម្ទី។

លោកបាននិយាយថា ក្រសួងរបស់លោកដែលទទួលខុសត្រូវក្នុងការសម្របសម្រួលកិច្ចខិតខំប្រឹងប្រែងបោសសម្អាតនេះ កំពុងធ្វើការជាមួយអង្គការនានា រួមទាំងកម្មវិធីអភិវឌ្ឍន៍អង្គការសហប្រជាជាតិ (UNDP) លើគម្រោងបើកផ្លូវឡើងវិញ និងដំណើរការយកកម្ទេចថ្មចេញ។

លោក Bseiso បានបន្តថា ដំណាក់កាលបន្ទាប់នឹងផ្តោតលើការបោសសម្អាតកម្ទេចថ្មពីអគារសាធារណៈចំនួន ១៥០ រួមទាំងសាលារៀន មន្ទីរពេទ្យ និងវិហារឥស្លាម និងការបើកផ្លូវឡើងវិញ។

លោក Bseiso បានបញ្ជាក់ថា ការសិក្សាដ៏ទូលំទូលាយមួយផ្អែកលើរបាយការណ៍ការខូចខាតចំនួន ២៥០.000 ដែលដាក់ជូនដោយអ្នកស្រុកត្រូវបានបញ្ចប់ ដោយបន្ថែមថា ក្រុមការងារ ត្រូវបានបង្កើតឡើងដើម្បីដោះស្រាយស្ថានការណ៍ទាំងនៅតំបន់វេសបែង និងហ្កាហ្សា។