ភ្នំពេញ ៖គិតត្រឹមម៉ោង៤រសៀលថ្ងៃទី២៤ខែមករានេះ គុណភាពខ្យល់នៅរាជធានីភ្នំពេញបានវិវត្តមករកភាពធម្មតាវិញ ពោលគឺចុះក្រោមបន្ទាត់ក្រហម។ នេះបើតាមប្រសាសន៍ឯកឧត្ដម ខ្វៃ អាទិត្យា អ្នកនាំពាក្យក្រសួងបរិស្ថាន បានផ្តល់កិច្ចសម្ភាសជាមួយអ្នកសារព័ត៌មាននៅរសៀលនេះ។

 ឯកឧត្តមបានបន្តថា គុណភាពនៅរាជធានីភ្នំពេញមានភាពល្អប្រសើរឡើងវិញនេះ ដោយសារមានការចូលរួមពីប្រជាពលរដ្ឋ និងអាជ្ញាធរពាក់ព័ន្ធចូលរួមទប់ស្តាត់ការបំពុលផ្សេងៗ ទៅលើបរិយាកាស។ ក្រៅពីនេះ ឯកឧត្តមបានស្នើដល់សាធារណសាធារណជន ធ្វើការតាមដានព័ត៌មានគុណភាពខ្យល់ជាប្រចាំតាមប្រព័ន្ធផ្សព្វផ្សាយរបស់ក្រសួងបរិស្ថាន និងការពារសុខភាពឱ្យបានល្អ ប្រសិនបើមានស្ថានភាពសុខភាពខុសប្រក្រតី គួរតែពិគ្រោះជាមួយគ្រូពេទ្យ នៅតាមមន្ទីរពេទ្យ ដែលស្ថិតនៅក្បែរកន្លែងរស់នៅ។

​គួរបញ្ជាក់ថា ការកើនឡើងកំហាប់សាធាតុបំពុលខ្យល់នៅក្នុងបរិយាកាសនេះ គឺពាក់ព័ន្ធនឹងការប្រែប្រួលអាកាសធាតុដែលបណ្តាលឲ្យភាគល្អិតនិចល PM2.5 មានការកើនឡើងព្រមទាំងការបញ្ចេញសារធាតុបំពុលពីប្រភពនានា ដូចជាមាន៖ ការដុតគល់ជញ្ជ្រាំង ភ្លើងឆេះព្រៃ ការដុតសំរាម សំណល់រឹងនៅតាមលំនៅដ្ឋាន និងប្រភពផ្សេងៗទៀត។ យ៉ាងណាក្តី ដើម្បីរក្សាគុណខ្យល់នៅក្នុងប្រទេសកម្ពុជាឲ្យបានល្អ ក្រសួងបរិស្ថានបានអំពាវនាវដល់ប្រជាពលរដ្ឋ និងអ្នកពាក់ព័ន្ធបញ្ឈប់សកម្មភាពទាំងអស់នេះ និងក្រសួងបរិស្ថានបានដាក់ចេញវិធានការជាបន្តបន្ទាប់ផងដែរ។ អត្ថបទ៖ទូច សោភ័ណ