វិមានក្រឹមឡាំង នៅថ្ងៃសុក្រ (ទី២៤ ខែមករា) នេះ បានប្រាប់ឲ្យដឹងថា សង្គ្រាមជាមួយអ៊ុយក្រែន គឺពាក់ព័ន្ធនឹងបញ្ហាសន្តិសុខជាតិរបស់ប្រទេសរុស្ស៊ី ហើយមិនមែនពាក់ព័ន្ធនឹងតម្លៃប្រេងនោះទេ ដោយការលើកឡើងនេះកើតមានបន្ទាប់ពីប្រធានាធិបតីសហរដ្ឋអាមេរិក លោក Donald Trump អំពាវនាវឲ្យបញ្ចុះតម្លៃប្រេង។

គួរបញ្ជាក់ថា លោក Trump កាលពីថ្ងៃព្រហស្បតិ៍ (ទី២៣ ខែមករា) បាននិយាយថា លោកនឹងទាមទារឲ្យប្រទេសអារ៉ាប៊ីសាអ៊ូឌីត និងអង្គការ OPEC ទម្លាក់តម្លៃប្រេង។

ដោយឆ្លើយតបទៅនឹងសំណួរដែលសួរអំពីការអត្ថាធិប្បាយទាំងនោះ អ្នកនាំពាក្យវិមានក្រឹមឡាំង លោក Dmitry Peskov បាននិយាយថា បញ្ហា សម្រាប់រុស្ស៊ី នៅអ៊ុយក្រែន គឺពាក់ព័ន្ធនឹងសន្តិសុខជាតិ ការគំរាមកំហែងដល់ជនជាតិរុស្ស៊ីដែលរស់នៅទីនោះ ហើយនិងការបដិសេធរបស់សហរដ្ឋអាមេរិក និងអឺរ៉ុប ដែលមិនព្រមស្តាប់ការព្រួយបារម្ភរបស់រុស្ស៊ី។

ប្រទេសអ៊ុយក្រែន និងអ្នកគាំទ្រ គឺក្រុមប្រទេសលោកខាងលិច ច្រានចោលការលើកឡើងទាំងនោះ ដោយនិយាយថា រុស្ស៊ីបានចាប់ផ្តើមសង្រ្គាមជាការដណ្តើមយកដែនដី តាមបែបចក្រពត្តិនិយម៕