ភ្នំពេញ ៖ ចាប់រាប់ត្រឹមថ្ងៃទី១០ ខែវិច្ឆិកាថ្ងៃនេះ នៅសល់ប្រមាណ៥ថ្ងៃទៀតប៉ុណ្ណោះ ការប្រឡងឌីប្លូម (ថ្នាក់ទី៩) នឹងចាប់ផ្តើមជាផ្លូវការហើយ ក្នុងនោះមន្ត្រីបានណែនាំឱ្យបេក្ខជនកុំភ័យ ប៉ុន្តែត្រូវអនុវត្តវិធានការសុខាភិបាល ៣ការពារ និង៣កុំ បើទោះគោលការណ៍អ្នកចេះគឺជាប់ដដែលបែបណាក្តី។
លោក ហែម ស៊ីណារ៉េត ប្រធានមន្ទីរអប់រំយុវជននិងកីឡា រាជធានីភ្នំពេញ បានឲ្យដឹងថា នៅរាជធានីភ្នំពេញ ឆ្នាំនេះ មានបេក្ខជនចូលរួមប្រឡងមានប្រមាណ ១៥ ៨៥៨នាក់ ហើយក៏មានបេក្ខជននៅសាលាឯកជនមួយចំនួនបានប្រឡងខ្លះៗហើយដែរ ហើយនៅថ្ងៃទី១៥ វិច្ឆិកា ដែលជាថ្ងៃប្រឡងឌីប្លូបនេះមាន ៦៣មណ្ឌល ចែកជា ៦៦៤បន្ទប់ ហើយបើប្រៀបធៀបឆ្នាំ២០២០កន្លងទៅ ឃើញថា មានការថយចុះជាងឆ្នាំមុនលើចំនួនបេក្ខជន ដោយឆ្នាំមុនមានបេក្ខជនចូលរួមប្រឡងចំនួន ២១៥៣២នាក់ នៅរាជធានីភ្នំពេញ ហើយការថមថយនេះ អាចបណ្តាលមកពីបរិបទកូវីដ-១៩ខ្លះ និងដោយសារបេក្ខជនស្វ័យរិនមានចំនួនតិចខ្លះផងដែរ។
លោក បន្តថា ការប្រឡងនេះ លោកស្នើសូមឱ្យបេក្ខជន កុំមានការភិតភ័យ ប៉ុន្តែត្រូវប្រកាន់ភ្ជាប់នូវវិធានការសុខាភិបាល គឺ៣ការពារ និង៣កុំ បើទោះគោលការណ៍អ្នកចេះគឺជាប់ដដែលបែបណាក្តី។
គួរបញ្ជាក់ថា ការប្រឡងឌីប្លូមនៅឆ្នាំនេះ នឹងប្រព្រឹត្តិទៅនៅថ្ងៃទី១៥ខែ វិច្ឆិកា ចំណែកការប្រកាសលទ្ធផលប្រឡងធ្វើនៅ ថ្ងៃទី២២ ខែវិច្ឆិកា ឆ្នាំ២០២១ ហើយការប្រឡងឆ្នាំនេះ គឺនៅតាមសាលារៀននីមួយៗ ជាអ្នករៀបចំប្រឡងដោយខ្លួនឯង ប៉ុន្តែតម្រូវឱ្យមានអនុរក្ស និងមន្ត្រីក្រសួង មន្ត្រីនៃមន្ទីរតាមដានការប្រឡងបន្ថែមផងដែរ៕
អត្ថបទ ៖ គង់ រ៉េន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
