សាកសពរបស់ជនរងគ្រោះនៃការផ្ទុះរថយន្តដឹកប្រេងនៅភាគខាងជើងប្រទេសនីហ្សេរីយ៉ា ត្រូវបានបញ្ចុះនៅក្នុងផ្នូរដ៏ធំមួយ ស្ថិតនៅមណ្ឌលសុខភាពក្នុងស្រុក Dikko រដ្ឋ Niger កាលពីយប់ថ្ងៃសៅរ៍ ទី ១៨ ខែមករាកន្លងទៅ ។ រថយន្តដឹកប្រេងបានក្រឡាប់ និងផ្ទុះ នៅព្រឹកថ្ងៃសៅរ៍នោះ ដោយបានសម្លាប់មនុស្សយ៉ាងហោច ៩៨នាក់ ដែលបាននាំគ្នាទៅដួសប្រេងពីរថយន្តក្រឡាប់ ។

 លោក Mohammed Chidawa គឺជាអ្នករស់រានមួយរូប មានការឈឺចាប់យ៉ាងខ្លាំងជាមួយនឹងការបាត់បង់មនុស្សជាទីស្រលាញ់ និងការប៉ះទង្គិចផ្លូវចិត្តដោយសារសោកនាដកម្មមួយនេះ ។

 លោក Chidawa បានរៀបរាប់ពីការតក់ស្លុត ពេលដែលលោកព្យាយាមជួយសង្រ្គោះបងប្រុសរបស់លោកចេញពីអណ្តាតភ្លើង ប៉ុន្តែចុងក្រោយលោកនៅតែមិនអាចជួយបងប្រុសលោកបានដដែល ។

 លោកនិយាយថា លោកបានឃើញបងប្រុសរបស់លោកដើរមក និងស្រែកទាំងការឈឺចាប់ពេលដែលភ្លើងឆាបឆេះរាងកាយរបស់គាត់ ដូច្នេះហើយលោកបានព្យាយាមជួយសង្រ្គោះគាត់ លោកបានព្យាយាម ហើយព្យាយាមទៀត ដើម្បីជួយសង្រ្គោះគាត់ ប៉ុន្តែលោកនៅតែមិនអាចជួយគាត់បានដដែល ។

 លោកបន្តថា ពេលដែលភ្លើងឆាបឆេះដៃរបស់លោក លោកក៏សម្រេចចិត្តទុកបងប្រុសចោលតែម្តង ។

 ទីភ្នាក់ងារគ្រប់គ្រងសង្រ្គោះបន្ទាន់រដ្ឋ Niger និយាយថា សាកសពមនុស្សជាច្រើន រកឃើញនៅក្នុងបំណែករថយន្ត ហើយមនុស្សមួយចំនួន បានស្លាប់នៅក្នុងមន្ទីរពេទ្យ ជាទីដែលពួកគេត្រូវបាននាំទៅព្យាបាល ។ 

 គិតត្រឹមថ្ងៃចន្ទ ទី ២០ ខែមករា ចំនួនមនុស្សស្លាប់ បានកើនឡើងដល់ ៩៨នាក់ ហើយនៅក្នុងចំណោមអ្នកស្លាប់នៅមន្ទីរពេទ្យ គឺជាឪពុករបស់អ្នកស្រី Maryam Musa ដែលជាពលរដ្ឋរស់នៅក្នុងស្រុក Dikko ។

 អ្នកស្រី Musa និយាយប្រាប់ទីភ្នាក់ងារព័ត៌មានរ៉យទ័រថា ឪពុករបស់អ្នកស្រីចិត្តល្អខ្លាំងណាស់ ។ មុនពេលស្លាប់ គាត់សុំការលើកលែងទោសពីពួកយើង គាត់និយាយថា គាត់មិនរស់នោះទេក្នុងសោកនាដកម្មនេះ ។ គាត់និយាយថា គាត់ស៊ូស្លាប់ប្រសើរជាជាងនៅរស់រងកម្មដោយសារការឈឺចាប់មួយនេះ ។

 គ្រោះមហន្តរាយនេះដែរ គឺជាគ្រោះមហន្តរាយស្លាប់មនុស្សច្រើនបំផុត ចាប់តាំងពីឧបទ្ទេវហេតុស្រដៀងគ្នានៅក្នុងរដ្ឋ Jigawa កាលពីខែតុលា ឆ្នាំ ២០២៤ ដែលបានសម្លាប់មនុស្ស ១៤៧នាក់ ៕