កោះតៃវ៉ាន់៖ ក្រសួងការពារជាតិរបស់កោះនេះបាននិយាយកាលពីថ្ងៃអង្គារថា កងកម្លាំងប្រដាប់អាវុធរបស់ប្រទេសចិនមានសមត្ថភាពរារាំងកំពង់ផែ និងអាកាសយានដ្ឋានសំខាន់ៗរបស់កោះតៃវ៉ាន់ ដោយផ្តល់ជូននូវការវាយតម្លៃចុងក្រោយរបស់ខ្លួនអំពីអ្វីដែលខ្លួនហៅថា ជាការគំរាមកំហែងផ្នែកយោធាធ្ងន់ធ្ងរដែលបង្កឡើងដោយប្រទេសជិតខាងដ៏ធំរបស់ខ្លួន។
ប្រទេសចិនមិនដែលបោះបង់ចោលការប្រើប្រាស់កម្លាំង ដើម្បីនាំយកតៃវ៉ាន់ដែលដឹកនាំបែបលទ្ធិប្រជាធិបតេយ្យមកនៅក្រោមការគ្រប់គ្រងរបស់ខ្លួនឡើយ ហើយបាននឹងកំពុងបង្កើនសកម្មភាពយោធានៅជុំវិញកោះនេះ រួមទាំងការហោះហើរយន្តហោះចម្បាំងម្តងហើយម្តងទៀត ចូលទៅក្នុងតំបន់ការពារដែនអាកាសរបស់កោះតៃវ៉ាន់។ ក្រសួងការពារជាតិកោះតៃវ៉ាន់ នៅក្នុងរបាយការណ៍ដែលខ្លួនចេញរៀងរាល់ពីរឆ្នាំម្តងបាននិយាយថា ប្រទេសចិនបានចាប់ផ្តើមនូវអ្វីដែលគេហៅថា សង្គ្រាមតំបន់ប្រផេះ ដោយលើកឡើងពី "ការឈ្លានពាន" ដោយយន្តហោះចម្បាំងរបស់ចិនចំនួន ៥៥៤គ្រឿងចូលទៅក្នុងភាគនិរតីនៃតំបន់កំណត់អត្តសញ្ញាណការពារដែនអាកាស នៅចន្លោះខែកញ្ញាឆ្នាំមុន និងចុងខែសីហា ឆ្នាំ២០២១ នេះ។
សារព័ត៌មាន Reuters បានរាយការណ៍កាលពីឆ្នាំមុនថា ក្រុមអ្នកវិភាគយោធានិយាយថា យុទ្ធវិធីនេះគឺមានគោលបំណងសង្គ្រុបកោះតៃវ៉ាន់តាមរយៈការធ្វើឲ្យកម្លាំងរបស់កោះនេះចុះខ្សោយ។ ក្រសួងការពារជាតិកោះតៃវ៉ាន់បាននិយាយថា ទន្ទឹមនឹងនេះកងទ័ពរំដោះប្រជាជនចិន (PLA) មានបំណងបញ្ចប់ទំនើបកម្មនៃកងកម្លាំងរបស់ខ្លួននៅត្រឹមឆ្នាំ២០៣៥ ដើម្បីទទួលបានឧត្តមភាពក្នុងប្រតិបត្តិការដែលអាចធ្វើទៅបានប្រឆាំងនឹងកោះតៃវ៉ាន់ និងសមត្ថភាពដែលអាចសម្រេចបានក្នុងការបណ្ដេញកងកម្លាំងបរទេស ដែលជាបញ្ហាប្រឈមយ៉ាងធ្ងន់ធ្ងរដល់សន្តិសុខជាតិរបស់យើង៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
