លោក Thameen Al-Kheetan គឺជាអ្នកនាំពាក្យការិយាល័យសិទ្ធិមនុស្សអង្គការសហប្រជាជាតិ(UN) និយាយនៅថ្ងៃសុក្រនេះថា ប្រតិបត្តិការរបស់អ៊ីស្រាអែលនៅតំបន់វ៉េសប៊ែង បានសម្លាប់ជនប៉ាឡេស្ទីនយ៉ាងហោច ១២នាក់ ចាប់តាំងពីថ្ងៃអង្គាររហូតមក ។

លោកបាននិយាយប្រាប់សន្និសីទសារព័ត៌មានថា ការិយាល័យរបស់ពួកយើង បានបញ្ជាក់ផ្ទៀងផ្ទាត់ថា ជនប៉ាឡេស្ទីនយ៉ាងហោច ១២នាក់ ត្រូវបានសម្លាប់ និងជនប៉ាឡេស្ទីន ៤០នាក់ផ្សេងទៀត បានរងរបួស ដោយសារកងកម្លាំងអ៊ីស្រាអែល ចាប់តាំងពីថ្ងៃអង្គាររហូតមក ហើយភាគច្រើននៃពួកគេ គ្មានអាវុធនៅក្នុងដៃនោះទេ ។

លោកបន្តថា មនុស្ស ៣ពាន់គ្រួសារនៅក្នុងទីក្រុង Jenin ត្រូវបានជម្លៀសខ្លួន ដោយសារអំពើហិង្សា ហើយទឹក និងចរន្តអគ្គិសនី ត្រូវបានរអាក់រអួល ។

ក្រុមសាក្សីនិយាយថា ពលរដ្ឋរស់នៅក្នុងទីក្រុង Jenin រាប់ពាន់នាក់ បានចាកចេញពីផ្ទះសម្បែងរបស់ពួកគេកាលពីថ្ងៃព្រហស្បតិ៍ បង្ខំចិត្តជម្លៀសខ្លួនដោយសារសារសំឡេងពីយានដ្រូនបំពាក់ឧបករណ៍បំពងសំឡេង ស្របពេលដែលយោធាកម្ទេចផ្ទះសម្បែងជាច្រើនខ្នងនៅថ្ងៃទី ៣នៃប្រតិបត្តិការទ្រង់ទ្រាយធំរបស់ពួកគេក្នុងទីក្រុងវ៉េសប៊ែង ។

ប្រតិបត្តិការដែលពាក់ព័ន្ធនឹងរថយន្តច្រើនគ្រឿង គាំទ្រដោយឧទ្ធម្ភាគចក្រ និងយានដ្រូននេះដែរ ត្រូវបានធ្វើឡើងនៅសប្តាហ៍ដំបូងនៃបទឈប់បាញ់ក្នុងតំបន់ហ្កាហ្សា ដែលគេមើលឃើញការដោះដូរលើកដំបូងនៃចំណាប់ថ្នូរអ៊ីស្រាអែល និងអ្នកទោសប៉ាឡេស្ទីន ជាប់ឃុំឃាំងនៅក្នុងពន្ធនាគារអ៊ីស្រាអែលចាប់តាំងពីមានបទឈប់បាញ់រយៈពេលខ្លីកាលពីខែវិច្ឆិកា ឆ្នាំ ២០២៣ ៕