អង្គការសហប្រជាជាតិ បានប្រកាសនៅថ្ងៃសុក្រថា ខ្លួនបានផ្អាកប្រតិបត្តិការផ្លូវការទាំងអស់ នៅក្នុងតំបន់នៃប្រទេសយេម៉ែន ក្រោមការគ្រប់គ្រងរបស់ក្រុមហ៊ួទី បន្ទាប់ពីការឃុំខ្លួនបុគ្គលិកUNបន្ថែមទៀត។

នៅក្នុងសេចក្តីថ្លែងការណ៍មួយ អង្គការសហប្រជាជាតិ បាននិយាយថា ការផ្អាកនេះ នឹងនៅតែមានជាធរមាន រហូតដល់មានការជូនដំណឹងបន្ថែម។ UN បានបន្ថែមថា មន្ត្រីជាន់ខ្ពស់របស់ខ្លួន កំពុងទាក់ទងជាមួយមេដឹកនាំហ៊ួទី ដោយទាមទារឲ្យមានការដោះលែងបុគ្គលិក និងដៃគូរបស់អង្គការសហប្រជាជាតិដែលត្រូវបានឃុំខ្លួនទាំងអស់ជាបន្ទាន់ និងដោយគ្មានលក្ខខណ្ឌ។

អាជ្ញាធរហ៊ួទី ដែលគ្រប់គ្រងភាគច្រើននៃភាគខាងជើងយេម៉ែន រួមទាំងរដ្ឋធានីសាណា មិនបានធ្វើអត្ថាធិប្បាយ អំពី ការសម្រេចចិត្តរបស់អង្គការសហប្រជាជាតិ ឬការទាមទាររបស់ខ្លួននោះទេ។

ប្រភពរដ្ឋាភិបាលយេម៉ែន ដែលនិយាយទៅកាន់សារព័ត៌មានស៊ីនហួ ក្នុងលក្ខខណ្ឌមិនបញ្ចេញឈ្មោះ បានអះអាងថា ក្រុមហ៊ួទី បានឃុំខ្លួនបុគ្គលិកយេម៉ែនយ៉ាងតិច ៧នាក់ ដែលធ្វើការឲ្យអង្គការអន្តរជាតិកាលពីយប់ថ្ងៃព្រហស្បតិ៍។ អ្នកជាប់ឃុំទាំងនោះ ត្រូវបានគេរាយការណ៍ថា បានធ្វើការជាមួយភ្នាក់ងារដូចជា UNICEF និងកម្មវិធីស្បៀងអាហារពិភពលោក។

នៅក្នុងខែមិថុនា ឆ្នាំ ២០២៤ ក្រុមហ៊ួទី បានធ្វើយុទ្ធនាការឃុំខ្លួនទ្រង់ទ្រាយធំមួយ ដោយផ្តោតលើបុគ្គលិកមកពីអង្គការសហប្រជាជាតិ អន្តរជាតិ និងអង្គការមនុស្សធម៌ក្នុងស្រុក នៅក្នុងទីក្រុងសាណា ។ នៅពេលនោះ អាជ្ញាធរហ៊ួទីបានអះអាងថា បានឃុំខ្លួន «សមាជិកសំខាន់ៗនៃបណ្តាញចារកម្មអាមេរិក-អ៊ីស្រាអែល» ដែលត្រូវបានសង្ស័យថា មានទំនាក់ទំនងជាមួយទីភ្នាក់ងារស៊ើបការណ៍សម្ងាត់កណ្តាលរបស់សហរដ្ឋអាមេរិក។