ទិន្នន័យពីផ្កាយរណបដែលវិភាគដោយសារព័ត៌មាន AP នៅថ្ងៃសៅរ៍នេះ បានបង្ហាញថា ការប្រយុទ្ធគ្នាជុំវិញរោងចក្រចម្រាញ់ប្រេងដ៏ធំបំផុតរបស់ប្រទេសស៊ូដង់ បានបង្កឲ្យមានការឆាបឆេះយ៉ាងសន្ធោសន្ធៅ ដោយបានបញ្ជូនផ្សែងពុលខ្មៅយ៉ាងក្រាស់ពាសពេញរដ្ឋធានីរបស់ប្រទេសនេះ។

ការវាយប្រហារជុំវិញរោងចក្រចម្រាញ់ប្រេង ដែលជាកម្មសិទ្ធិរបស់រដ្ឋាភិបាលប្រទេសស៊ូដង់ និងក្រុមហ៊ុន China National Petroleum Corp. ដែលគ្រប់គ្រងដោយរដ្ឋ គឺជាវិបត្តិចុងក្រោយបង្អស់ នៅក្នុងសង្គ្រាមរវាងកងកម្លាំងគាំទ្ររហ័សរបស់ឧទ្ទាម (RSF) និងយោធាស៊ូដង់ ដែលបានស្តីបន្ទោសគ្នាទៅវិញទៅមក ចំពោះការឆាបឆេះនេះ។

កិច្ចប្រឹងប្រែងសម្របសម្រួលអន្តរជាតិ និងយុទ្ធសាស្ត្រ ដាក់សម្ពាធ រួមទាំងការវាយតម្លៃរបស់សហរដ្ឋអាមេរិកដែលថា កងកម្លាំងគាំទ្ររហ័ស (RSF) និងក្រុមតំណាងរបស់ខ្លួន កំពុងប្រព្រឹត្តអំពើប្រល័យពូជសាសន៍ មិនបានបញ្ឈប់ការប្រយុទ្ធគ្នានោះទេ។

រោងចក្រចម្រាញ់ប្រេង Al-Jaili ស្ថិតនៅចម្ងាយប្រហែល ៦០ គីឡូម៉ែត្រ (៤០ម៉ាយ) ភាគខាងជើងនៃទីក្រុងខាទុំ Khartoum។ រោងចក្រចម្រាញ់ប្រេងនេះ ត្រូវរងការវាយប្រហារពីមុនមក ខណៈដែល RSF បានដណ្តើមបានគ្រប់គ្រងរោងចក្រនេះ តាំងពីខែមេសា ឆ្នាំ ២០២៣ ខណៈដែលកងកម្លាំងរបស់ពួកគេ បានការពារវានោះ។ ប្រព័ន្ធផ្សព្វផ្សាយស៊ូដង់ក្នុងស្រុករាយការណ៍ថា RSF ក៏បានឡោមព័ទ្ធរោងចក្រចម្រាញ់ ប្រេង នៅក្នុងតំបន់ដែលមានគ្រាប់មីន ដើម្បីបន្ថយល្បឿនការរុលចូលទៅមុខ។

ប៉ុន្តែរោងចក្រដែលមានសមត្ថភាពអាចគ្រប់គ្រងប្រេងបាន ១០០.000ធុងក្នុងមួយថ្ងៃ គឺនៅដដែល រហូតដល់ថ្ងៃព្រហស្បតិ៍។