កាលពីថ្ងៃសៅរ៍ម្សិលមិញ ក្រុមបាតុកររាប់ម៉ឺននាក់ នាំគ្នាតវ៉ាប្រឆាំងក្រុមនយោបាយស្តាំនិយម និងគណបក្ស AfD នៅទីក្រុងប៊ែរឡាំង និងទីក្រុង Cologne ប្រទេសអាល្លឺម៉ង់ ។

បាតុកម្មនេះ បានកើតមានឡើងនៅថ្ងៃតែមួយ ពេលដែលគណបក្ស AfD ចាប់ផ្តើមយុទ្ធនាការឃោសនាស្វែងរកសំឡេងឆ្នោតរបស់ពួកគេ សម្រាប់ការបោះឆ្នោតមុនកាលកំណត់នាខែកុម្ភៈខាងមុខនេះ និងរយៈពេលប៉ុន្មានថ្ងៃប៉ុណ្ណោះ ក្រោយការវាយប្រហារកាំបិតដោយជនជាតិអាហ្វហ្គានីស្ថាន បណ្តាលឲ្យមនុស្ស ២នាក់ស្លាប់ ធ្វើឲ្យកើតមានការជជែកដេញដោលជុំវិញការធ្វើអន្តោប្រវេសន៍នៅក្នុងប្រទេសអាល្លឺម៉ង់ ។

លោក Karl Lauterbach គឺជារដ្ឋមន្រ្តីក្រសួងសុខាភិបាលអាល្លឺម៉ង់ដែលបានចូលរួមបាតុកម្មនេះ និយាយថា ពួកយើងកំពុងស្ថិតក្នុងស្ថានភាពធ្ងន់ធ្ងរ ។ ជនបរទេសដ៏គួរឲ្យស្អប់មានចំនួនកើនឡើង ការត្រៀមខ្លួនប្រើប្រាស់អំពើហិង្សា មានចំនួនកើនឡើង ហើយប្រជានិយមក៏មានចំនួនកើនឡើងដូចគ្នា ។

ចំណែកឯអ្នកស្រី Martina Morawietz គឺជាបាតុករមួយរូបទៀត និយាយថា អ្នកស្រីមកទីនេះ គឺដើម្បីរក្សាសិទ្ធិមនុស្ស ។

សូមបញ្ជាក់ថា បច្ចុប្បន្ន គណបក្ស AfD ឈរនៅចំណាត់ថ្នាក់លេខ ២ក្នុងការស្ទង់មតិសម្រាប់ការបោះឆ្នោតសកលនាពេលខាងមុខ ក្នុងនោះគណបក្សប្រឆាំងអភិរក្សនិយម CDU របស់លោក Friedrich Merz កំពុងនាំមុខគេ ។

ដោយឡែក គណបក្សកាន់អំណាចសង្គមប្រជាធិបតេយ្យ(SPD)របស់លោកអធិការបតី Olaf Scholz និងគណបក្ស Green ឈរនៅចំណាត់ថ្នាក់លេខ ៣ និងលេខ ៤ ៕