ប្រភពបានប្រាប់សារព័ត៌មានរ៉យទ័រ កាលពីថ្ងៃអាទិត្យ (២៦ មករា) ថា ក្រុមហ៊ុនម៉ាស៊ីនស្វែងរករបស់អាមេរិកឈ្មោះ Perplexity AI បានកែប្រែសំណើរួមបញ្ចូលគ្នាមួយ ដែលខ្លួនបានដាក់ជូនក្រុមហ៊ុនមេ TikTok របស់ចិនគឺ ByteDance ដើម្បីបង្កើតអង្គភាពថ្មីមួយ ដែលរួមបញ្ចូលរវាង Perplexity និង TikTok នៅអាមេរិក។

ប្រភពសង្កត់ធ្ងន់ថា សំណើនោះស្នើឱ្យរដ្ឋាភិបាលសហរដ្ឋអាមេរិក កាន់កាប់រហូតដល់ ៥០% នៃក្រុមហ៊ុនរួមថ្មីនេះ លើភាគហ៊ុននៃការផ្តល់ជូនជាសាធារណៈដំបូង ឬហៅថាការលក់ភាគហ៊ុនដំបូង IPO។ ប្រភពបន្តថា ឯកសារពីក្រុមហ៊ុន Perplexity ចែករំលែកជាមួយ ByteDance និងអ្នកវិនិយោគថ្មី បានស្នើបង្កើតក្រុមហ៊ុនកាន់កាប់របស់សហរដ្ឋអាមេរិកថ្មីមួយ ដែលមានឈ្មោះថា "NewCo"។

នៅក្រោមសំណើនេះ ByteDance នឹងលក់ TikTok នៅអាមេរិក ទៅឱ្យវិនិយោគិន ដែលនឹងផ្តល់ភាគហ៊ុនឱ្យអ្នកវិនិយោគស្រាប់របស់ TikTok នៅក្នុងក្រុមហ៊ុនថ្មីនេះ។ សំណើនេះក៏នឹងដកចេញនូវប្រព័ន្ធមុខងារអនុសាសន៍ស្នូលរបស់ TikTok ផងដែរ ហើយឱ្យ ByteDance រក្សាទុក។

រដ្ឋាភិបាលអាមេរិក នឹងកាន់កាប់រហូតដល់ពាក់កណ្តាលនៃរចនាសម្ព័ន្ធថ្មី នៅពេលដែលឆ្លងកាត់ការលក់ភាគហ៊ុន IPO នៃតម្លៃយ៉ាងហោចណាស់ ៣០០ពាន់លានដុល្លារ៕