ប្រធានាធិបតីអ៊ុយក្រែន លោក Volodymyr Zelenskiy កាលពីថ្ងៃអាទិត្យ (២៦ មករា) បានជំនួសតំណែងមេបញ្ជាការជាលើកទី៣ ក្នុងរយៈពេលតិចជាងមួយឆ្នាំ នៃកងកម្លាំងយោធាអ៊ុយក្រែនដ៏សំខាន់ដែលទទួលខុសត្រូវក្នុងការការពារទីក្រុងមជ្ឈមណ្ឌលភាគខាងកើត Pokrovsk ដ៏សំខាន់ ដែលស្ថិតក្រោមហានិភ័យកាន់តែខ្លាំងនៃការធ្លាក់ចូលក្នុងដៃរបស់កងកម្លាំងរុស្ស៊ី។

លោក Zelenskiy នៅក្នុងសុន្ទរកថាវីដេអូពេលយប់របស់ខ្លួនបាននិយាយថា លោកបានដាក់មេបញ្ជាការកងកម្លាំងជើងគោកថ្មីរបស់អ៊ុយក្រែន គឺឧត្តមសេនីយឯក Mykhailo Drapatyi ទទួលបន្ទុកក្រុមយុទ្ធសាស្រ្ត-ប្រតិបត្តិការ ខូទីសៀ (Khortytsia) ដែលតំបន់ទទួលខុសត្រូវរួមមានជួរមុខភាគខាងកើតរបស់អ៊ុយក្រែន។

មេដឹកនាំអ៊ុយក្រែនរូបនេះបន្តថា "ទាំងនេះគឺជាតំបន់ដ៏លំបាកបំផុតនៃការប្រយុទ្ធ" ដោយបន្ថែមថាការតែងតាំងលោក Drapatyi នឹងជួយរួមបញ្ចូលគ្នានូវការងារប្រយុទ្ធរបស់កងទ័ព ជាមួយនឹងការបណ្តុះបណ្តាលកងពលតូចយ៉ាងត្រឹមត្រូវ។

ប្រសិនបើរុស្ស៊ី ដណ្តើមកាន់កាប់បានទីក្រុងមួយនេះ នឹងនាំឱ្យទីក្រុងមូស្គូកាន់តែខិតទៅជិតការដណ្តើមយកតំបន់ Donetsk ទាំងមូល ដែលជាគោលដៅសំខាន់មួយរបស់លោកប្រធានាធិបតីរុស្ស៊ី Vladimir Putin ក្នុងសង្គ្រាមរបស់លោកនៅអ៊ុយក្រែន៕