យោងតាមការស្ទង់មតិក្រោយការបោះឆ្នោតរបស់ទូរទស្សន៍រដ្ឋ បានឲ្យដឹងថា មេដឹកនាំប្រទេសបេឡារុស លោក Alexander Lukashenko កំពុងស្ថិតនៅលើផ្លូវដើម្បីបន្តការគ្រប់គ្រងរយៈពេល៣១ឆ្នាំរបស់លោក ដោយទទួលបានសំឡេង៨៧,៦ភាគរយនៅក្នុងការបោះឆ្នោតប្រធានាធិបតី កាលពីថ្ងៃអាទិត្យ ទី២៦ ខែមករា បន្ទាប់ពីបានបង្ហាញពីជំហរផ្គើនដាក់លោកខាងលិច។

សម្ព័ន្ធមិត្តជិតស្និទ្ធរបស់ប្រធានាធិបតីរុស្ស៊ី លោក វ្ល៉ាឌីមៀ ពូទីន បានដឹកនាំប្រទេសបេឡារុស ចាប់តាំងពីឆ្នាំ១៩៩៤។ សហរដ្ឋអាមេរិក និងសហភាពអឺរ៉ុប ទាំងពីរនេះបាននិយាយនៅក្នុងអំឡុងពេលចុងក្រោយនៃការបោះឆ្នោតថា វានឹងក្លាយជាការក្លែងបន្លំ ដោយសារតែប្រព័ន្ធផ្សព្វផ្សាយឯករាជ្យ ត្រូវបានហាមឃាត់នៅក្នុងប្រទេសបេឡារុស ហើយឥស្សរជនប្រឆាំងឈានមុខទាំងអស់ ត្រូវបានបញ្ជូនទៅកាន់ពន្ធនាគារកម្រិតធ្ងន់ ឬត្រូវបានបង្ខំឱ្យភៀសខ្លួនទៅបរទេស។

ដោយប្រឈមនឹងការចាប់ដាក់ពន្ធនាគារចំពោះអ្នកប្រឆាំង លោក Lukashenko បានប្រាប់អ្នកសារព័ត៌មានថា ក្រុមអ្នកប្រឆាំងជាអ្នកបង្កើតជោគវាសនារបស់ពួកគេផ្ទាល់។ «អ្នកមួយចំនួនជ្រើសរើសយកពន្ធនាគារ អ្នកមួយចំនួនទៀតជ្រើសរើសយកការនិរទេស។ យើងមិនបានបណ្តេញនរណាម្នាក់ចេញពីប្រទេសនោះទេ»។

លោកនិយាយថា គ្មាននរណាម្នាក់ត្រូវបានរារាំងមិនឱ្យនិយាយស្តីនៅក្នុងប្រទេសបេឡារុសទេ ប៉ុន្តែពន្ធនាគារគឺសម្រាប់អ្នកដែលបើកមាត់របស់ពួកគេធំពេក ជាអ្នកដែលបំពានច្បាប់។

ការស្ទង់មតិក្រោយការបោះឆ្នោត ត្រូវបានចាក់ផ្សាយដោយទូរទស្សន៍រដ្ឋភ្លាមៗបន្ទាប់ពីការបោះឆ្នោត បានបិទ។

ក្រុមមន្ត្រីបាននិយាយថា ចំនួនអ្នកទៅបោះឆ្នោតមាន៨១,៥ភាគរយ ដែលក្នុងនេះមនុស្ស៦,៩ លាននាក់ មានសិទ្ធិបោះឆ្នោត។