អាជ្ញាធរប្រទេសម៉ាឡេស៊ី បានបង្វែរទូកជាច្រើនគ្រឿងដែលដឹកអ្នកស្វែងរកសិទ្ធិជ្រកកោនជនជាតិរ៉ូហ៊ីងយ៉ា នៅឆ្នាំនេះ ក្នុងពេលមានការព្រួយបារម្ភពីសហគមន៍ក្នុងតំបន់។ យោងតាមទីភ្នាក់ងារអនុវត្តច្បាប់ដែនសមុទ្រម៉ាឡេស៊ីបានឲ្យដឹងថា ទូកពីរគ្រឿង មានដឹកអ្នកស្វែងរកសិទ្ធិជ្រកកោនប្រហែល ៣០០នាក់ ត្រូវបានបង្វែរចេញកាលពីពេលថ្មីៗនេះ បន្ទាប់ពីពួកគេត្រូវបានផ្តល់អាហារ និងទឹក។

ក្រោយមក ពួកគេត្រូវបានគេរាយការណ៍ថាបានចូលចតនៅជិតទីក្រុង អាឆេ(Aceh) ប្រទេសឥណ្ឌូនេស៊ី។ រដ្ឋមន្ត្រីក្រសួងមហាផ្ទៃម៉ាឡេស៊ី លោក Saifuddin Nasution Ismail បាននិយាយថា «ក្រុមអនុវត្តច្បាប់របស់យើង បានរកឃើញទូករបស់អ្នកស្វែងរកសិទ្ធិជ្រកកោនស្ទើរតែរាល់ថ្ងៃ ដោយអណ្តែតលើដែនទឹកអន្តរជាតិ»។

ក្នុងរយៈពេលតត្រឹមតែប៉ុន្មានម៉ោងនៅថ្ងៃទី៣ ខែមករា ទូកឈើមួយគ្រឿងដឹកជនជាតិភាគតិចរ៉ូហ៊ីងយ៉ាជិត២០០នាក់ ដែលរត់គេចចេញពីការធ្វើទុក្ខបុកម្នេញក្នុងសហភាពមីយ៉ាន់ម៉ា បានចូលចតនៅលើច្រាំងនៃទីក្រុង Teluk Yu ជាទីតាំងទាក់ទាញភ្ញៀវទេសចរ នៅកោះ Langkawi ដ៏ពេញនិយមសម្រាប់ថ្ងៃឈប់សម្រាក ។

ពួកគេភាគច្រើនជាស្ត្រី និងកុមារ ដែលកំពុងស្វែងរកសិទ្ធិជ្រកកោននៅក្នុងប្រទេសម៉ាឡេស៊ី។ ពួកគេលាក់ខ្លួននៅបាតទូកដែលក្លែងបន្លំជាទូកនេសាទ។

មនុស្សជាច្រើនក្នុងចំណោមសហគមន៍ក្នុងស្រុក មានអារម្មណ៍មិនសប្បាយចិត្តចំពោះវត្តមានរបស់ទូកបរទេសបែបនេះ។

គិតត្រឹមចុងឆ្នាំមុន ឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR) បានកត់ត្រាជនភៀសខ្លួន និងអ្នកស្វែងរកសិទ្ធិជ្រកកោនជិត២០០.០០០នាក់នៅក្នុងប្រទេសម៉ាឡេស៊ី។ អ្នកចុះឈ្មោះប្រហែល ១៧០.០០០នាក់មកពីសហភាពមីយ៉ាន់ម៉ា ហើយភាគច្រើនជាជនជាតិភាគតិចរ៉ូហ៊ីងយ៉ា។