ប្រទេសចិន បានហាមប្រាមការនាំចូលសត្វចៀម ពពែ បសុបក្សី និងសត្វពាហនៈ ពីបណ្តាប្រទេសអាហ្រ្វិក អាស៊ី និងអ៊ឺរ៉ុប ដោយសារការផ្ទុះឡើងនៃជំងឺបសុសត្វ ដូចជាជំងឺអុតក្ដាមលើចៀម ពពែ និងសត្វដទៃទៀត។

ការហាមប្រាម ដែលរួមបញ្ចូលផងដែរនូវផលិតផលកែច្នៃ និងមិនទាន់កែច្នៃ បានកើតឡើងបន្ទាប់ពីអង្គការសុខភាពពិភពលោក បានចេញផ្សាយព័ត៌មាននៃការផ្ទុះជំងឺនៅក្នុងប្រទេសផ្សេងៗ នេះបើតាមការប្រកាសជាបន្តបន្ទាប់របស់រដ្ឋបាលគយចិន ចុះថ្ងៃទី ២១ ខែមករា។

បម្រាមពីប្រទេសនាំចូលសាច់ធំជាងគេលើពិភពលោកមួយនេះ ប៉ះពាល់ដល់ប្រទេសហ្គាណា សូម៉ាលី កាតា កុងហ្គោ នីហ៊្សេរីយ៉ា និងតង់ហ្សានី អេហ្ស៊ីប ប៊ុលហ្គារី ទីម័រខាងកើត និងអេរីត្រេ ខណៈចិនក៏បញ្ឈប់ការនាំចូលសត្វចៀម ពពែ និងផលិតផលដែលពាក់ព័ន្ធពីដែនដីប៉ាឡេស្ទីន ប៉ាគីស្ថាន អាហ្វហ្គានីស្ថាន នេប៉ាល់ និងបង់ក្លាដែស ហើយក៏បានបិទការនាំចូលសត្វពាហនៈមួយចំនួន និងផលិតផលពាក់ព័ន្ធពីអាល្លឺម៉ង់។

ជំងឺអុតក្តាម ជាជំងឺឆ្លងដែលកើតមានលើចំពោះសត្វដែលមានចង្វែកជើងពីរដូចជា គោ ក្របី ជ្រូក ពពែ និងចៀម ហើយជាជំងឺដែលមានលក្ខណៈរាតត្បាត រាលដាល យ៉ាងឆាប់រហ័យ និងខ្លាំងក្លាបំផុត។ ជំងឺអុតក្ដាមបង្កឡើងដោយវីវុស និងមិនមានថ្នាំព្យាបាលឡើយ ប៉ុន្តែសត្វភាគច្រើននឹងអាចជាវិញដោយខ្លួនឯងក្នុងរយៈពេលប្រហែល ១០ថ្ងៃ៕