នាយករដ្ឋមន្ត្រីអង់គ្លេស លោក Keir Starmer និងប្រធានាធិបតីអាមេរិក លោក Donald Trump បានពិភាក្សាគ្នា អំពីពាណិជ្ជកម្ម អំឡុងពេលមានការសន្ទនាជាលើកដំបូងរបស់មេដឹកនាំទាំង២ ចាប់តាំងពីលោក Trump ចូលគ្រប់គ្រងសេតវិមានជាថ្មីម្ដងទៀត។ មេដឹកនាំទាំង២ ក៏បានព្រមព្រៀងឲ្យមាន «ការជួបគ្នាឆាប់ៗនេះ» ផងដែរ។

បើយោងតាមព័ត៌មានពីសេតវិមាន បានឲ្យដឹងថា មេដឹកនាំទាំង២ បានលើកឡើងអំពី «របៀបដែលប្រទេសទាំង២ អាចលើកកម្ពស់ទំនាក់ទំនងសេដ្ឋកិច្ចទ្វេភាគីដោយយុត្តិធម៌» អំឡុងពេលជជែកគ្នាតាមទូរសព្ទ កាលពីថ្ងៃអាទិត្យ (ទី២៦ ខែមករា)។ ការពិភាក្សារបស់ថ្នាក់ដឹកនាំកំពូលទាំង២ ស្តីពីពាណិជ្ជកម្មនេះ កើតមានឡើងចំពេលដែលលោក Trump គំរាមដំឡើងពន្ធលើប្រទេសកាណាដា ម៉ិកស៊ិក និងចិន នៅថ្ងៃទី១ ខែកុម្ភៈ។

លោក Trump បានត្អូញត្អែរម្តងហើយម្តងទៀត អំពីឱនភាពពាណិជ្ជកម្ម និងឧបសគ្គនានា ដែលបង្ហាញសញ្ញាថា លោកនឹងប្រើប្រាស់គោលនយោបាយពន្ធដារ ដើម្បីធ្វើឲ្យពាណិជ្ជកម្មទ្វេភាគីមានតុល្យភាព។ យ៉ាងណាក្ដី គេនៅមិនទាន់ដឹងច្បាស់ទេថា តើការយកពន្ធបែបនេះ នឹងឡើងខ្ពស់ ឬរីករាលដាលដល់កម្រិតណា។ លោកប្រធានាធិបតីអាមេរិកថ្មី បានដំឡើងពន្ធ និងដាក់បម្រាមមិនឲ្យមានការធ្វើដំណើរ លើប្រទេសកូឡុំប៊ី កាលពីថ្ងៃទី២៦ ខែមករា បន្ទាប់ពីប្រទេសអាមេរិកខាងត្បូងមួយនេះបដិសេធមិនអនុញ្ញាតឲ្យយន្តហោះ ២គ្រឿងដែលដឹកជនអន្កោប្រវេសន៍និរទេស ចុះចតនៅលើដែនដីរបស់ខ្លួន។

បើទោះជាបីសហរដ្ឋអាមេរិក និងអង់គ្លេស គឺជាសម្ព័ន្ធមិត្តជិតស្និទ្ធជាប្រវត្តិសាស្ត្រយ៉ាងណាក្ដី ក៏របៀបវារៈគោលនយោបាយរបស់លោក Trump ធ្វើឲ្យលោកមានជម្លោះជាមួយចក្រភពអង់គ្លេស ក្នុងវិស័យជាច្រើន ក្នុងនោះរួមទាំងផែនការចាប់ផ្តើមដំឡើងពន្ធដែលអាចប៉ះពាល់ដល់ការនាំចេញរបស់អង់គ្លេស ទោះលោកជ្រើសរើសមិនកំណត់គោលដៅលើចក្រភពអង់គ្លេសដោយផ្ទាល់ក៏ដោយ៕