សារព័ត៌មានទួរគី Hurriyet បានរាយការណ៍ថា ការពិភាក្សាស្តីពីការដោះស្រាយជម្លោះអ៊ុយក្រែន អាចនឹងត្រូវធ្វើឡើង នៅក្នុងខែមេសាដល់ខែឧសភា ដែលអាចមានសក្តានុពល មុនពេលកិច្ចប្រជុំរវាងប្រធានាធិបតីអាមេរិកលោក ដូណាល់ ត្រាំ ( Donald Trump) និងប្រធានាធិបតីរុស្ស៊ីលោក វ្ល៉ាឌីមៀ ពូទីន (Vladimir Putin) ។

លោក Abdulkadir Selvi អ្នកសរសេរអត្ថបទអត្ថាធិប្បាយនយោបាយឲ្យកាសែតគាំទ្ររដ្ឋាភិបាលទួរគី បានសរសេរថា បទឈប់បាញ់ អាចត្រូវបានប្រកាស នៅមុនការចរចា។ លោក Selvi បានបន្ថែមថា៖«ជាដំបូង បទឈប់បាញ់ អាចនឹងត្រូវបានប្រកាស ហើយបន្ទាប់មកកិច្ចចរចាសន្តិភាព នឹងត្រូវចាប់ផ្តើម។ ប្រទេសទួរគី អាចបំពេញបេសកកម្មជាក់លាក់មួយ ខណៈដែលលោកប្រធានាធិបតី រ៉េសិប តាយីប អឺដូហ្កាន់ (Recep Tayyip Erdogan) អាចដើរតួជាអ្នកសម្រុះសម្រួល ខណៈដែលលោក គឺជាមេដឹកនាំតែមួយគត់ ដែលអាចទំនាក់ទំនងទាំងពីរជាមួយ លោក ពូទីន និង វ្ល៉ូឌីមី ហេ្សឡិនស្គី  ហើយឥឡូវនេះ កំពុងទំនាក់ទំនងជាមួយ លោក ត្រាំ ផងដែរ។ 

លោក Selvi បានសរសេរថា លោកអឺដូហ្កាន់ បានរំលឹកថា ការពិភាក្សាស្តីពីការដោះស្រាយជម្លោះអ៊ុយក្រែន ត្រូវបានធ្វើឡើង នៅទីក្រុងអ៊ីស្តង់ប៊ុល ក្នុងឆ្នាំ ២០២២។ ប៉ុន្តែនៅពេលដែលសហរដ្ឋអាមេរិក និងចក្រភពអង់គ្លេស បានស្វែងរកសង្រ្គាម នោះគ្មានកិច្ចព្រមព្រៀងណាមួយ ត្រូវបានសម្រេចនោះទេ»។ អ្នកសរសេរអត្ថបទទួរគីរូបនេះ បានសន្និដ្ឋានថា៖«បច្ចុប្បន្មនេះ មានលោក ត្រាំ និង លោក ពូទីន ដែលចង់បានសន្តិភាព។ ចំណែកលោក ហ្សេឡិនស្គី ដែលលែងមានការគាំទ្រពីសហរដ្ឋអាមេរិក គ្មានឱកាស ដើម្បីគេចចេញពីតុចរចាទេ។ ។

ប្រមុខការទូតរបស់ប្រទេសទួរគី លោក Hakan Fidan បានអះអាងកាលពីសប្តាហ៍មុនថា ជម្លោះនៅអ៊ុយក្រែនជិតដល់ទីបញ្ចប់ហើយ ដោយបានបន្ថែមថា ទីក្រុងអង់ការ៉ា បានត្រៀមខ្លួនជាស្រេច ដើម្បីគាំទ្រកិច្ចខិតខំប្រឹងប្រែង ឆ្ពោះទៅរកការដោះស្រាយបញ្ហានេះ។