រដ្ឋបាលរបស់លោក Donald Trump បានជំរុញឲ្យបុគ្គលិកទីភ្នាក់ងារសហរដ្ឋអាមេរិក សម្រាប់ការអភិវឌ្ឍអន្តរជាតិ (USAID) ចូលរួមកិច្ចខិតខំប្រឹងប្រែង ដើម្បីផ្លាស់ប្តូររបៀបដែលទីក្រុងវ៉ាស៊ីនតោនបែងចែកជំនួយ នៅជុំវិញពិភពលោក ស្របតាមគោលនយោបាយ «America First» (អាមេរិកជាអាទិភាពចម្បង) របស់លោក Trump។ បុគ្គលិកទាំងឡាយណាដែលមិនអើពើនឹងបទបញ្ជារបស់រដ្ឋបាល ត្រូវប្រឈមជាមួយ «ចំណាត់ការវិន័យ»។

អនុស្សរណៈដែលមានពាក្យពេចន៍យ៉ាងតឹងរ៉ឹង និងដែលបានផ្ញើកាលពីថ្ងៃទី២៥ ខែមករា ទៅបុគ្គលិកជាង ១.០០០នាក់ នៅ USAID បានផ្តល់ការណែនាំបន្ថែម ពីលើបទបញ្ជា «បញ្ឈប់សកម្មភាព» កាលពីថ្ងៃទី២៤ ខែមករា ដែលមានប្រសិទ្ធិភាពធ្វើឲ្យមានការបង្កកយ៉ាងទូលំទូលាយលើជំនួយបរទេសរបស់សហរដ្ឋអាមេរិក នៅទូទាំងពិភពលោក។ អនុស្សរណៈដែលត្រូវបានពិនិត្យដោយសារព័ត៌មាន Reuters បានដាក់ចេញនូវការរំពឹងទុក ដើម្បីឲ្យបុគ្គិលិកដឹងពីរបៀបសម្រេចបាននូវគោលដៅរបស់លោក Trump។

នៅក្នុងអនុស្សរណៈផ្ទៃក្នុងដែលមានចំណងជើងថា «សារ និងការរំពឹងទុក ចំពោះបុគ្គលិកទាំងអស់» លោក Ken Jackson ជំនួយការទទួលបន្ទុកគ្រប់គ្រងផ្នែកចាត់ចែងត្រួតពិនិត្យ និងធនធាន បានសរសេរថា៖ «យើងត្រូវទទួលខុសត្រូវ ក្នុងការគាំទ្រប្រធានាធិបតី ដើម្បីសម្រេចឲ្យបាននូវចក្ខុវិស័យរបស់លោក»៕