ទីភ្នាក់ងារព័ត៌មានផ្លូវការ IRNA បានរាយការណ៍ថា មេបញ្ជាការយោធាជាន់ខ្ពស់របស់អ៊ីរ៉ង់ បាននិយាយកាលពីថ្ងៃអាទិត្យថា យានដ្រូនរបស់ប្រទេសនេះ ត្រូវបានបំពាក់ដោយមីស៊ីលក្នុងស្រុក ដែលប្រើបច្ចេកវិទ្យាបញ្ញាសិប្បនិម្មិត(AI)។

មេបញ្ជាការកងទ័ពជើងទឹកនៃកងឆ្មាំបដិវត្តន៍ឥអ៊ីស្លាម (IRGC) លោក Alireza Tangsiri បានធ្វើការអត្ថាធិប្បាយ នៅក្នុងសុន្ទរកថាមួយ ទៅកាន់អ្នកសារព័ត៌មាន នៅខេត្ត Bushehr ភាគខាងត្បូងប្រទេសអ៊ីរ៉ង់   ខណៈដែលលោកកំពុងនិយាយលម្អិតអំពីសមយុទ្ធកងទ័ពជើងទឹកទ្រង់ទ្រាយធំ រយៈពេលពីរថ្ងៃ ដែលធ្វើឡើងដោយកងកម្លាំងរបស់លោក នៅក្នុងដែនទឹកភាគខាងត្បូងប្រទេសនេះ។

លោកបាននិយាយថា កងទ័ពជើងទឹក IRGC បានបំពាក់យានដ្រូនប្រយុទ្ធផលិតក្នុងស្រុកចំនួនពីរ Mohajer-6 និង Ababil-5 ជាមួយនឹងមីស៊ីល «Qaem និង Almas» ដែលប្រើបច្ចេកវិទ្យាAI។

លោក Tangsiri បានបន្ថែមថា កងទ័ពជើងទឹក IRGC និងក្រសួងការពារជាតិអ៊ីរ៉ង់ កំពុងអភិវឌ្ឍន៍មីស៊ីលតម្រង់គោលដៅបំពាក់ដោយ AI ដែលមានរយៈចម្ងាយប្រតិបត្តិការជាង ១.000គីឡូម៉ែត្រ និងសមត្ថភាពបាញ់ដល់គោលដៅ នៅរយៈកម្ពស់ខុសៗគ្នា។

យោងតាមលោក Tangsiri បានឲ្យដឹងថា សមយុទ្ធដែលចាប់ផ្តើម កាលពីថ្ងៃសុក្រ នៅឯឆ្នេរសមុទ្រនៃខេត្ត Bushehr និង Khuzestan ក្នុងគោលបំណងបង្ហាញ «សន្តិភាព និងមិត្តភាព» ដល់អ្នកជិតខាង ហើយបង្ហាញថា អ៊ីរ៉ង់ និងរដ្ឋក្នុងតំបន់ អាចធានាសន្តិសុខ ហើយទប់ទល់នឹងការគំរាមកំហែងណាមួយ។