​​បាល់បោះ៖ កីឡាករ​បាល់បោះ Stephen Curry រកបាន​ម្នាក់ឯង​ដល់​ទៅ ៥០​ពិន្ទុ​បូករួម​ទាំង​បាល់​បញ្ជូន ១០​គ្រាប់​ផ្សេងទៀត​ជួយ​ឱ្យ​ក្រុម​បាល់បោះ Golden State Warriors យកឈ្នះ Atlanta Hawks ១២៧-១១៣ ការប្រកួត​បាល់បោះ​ក្របខណ្ឌ NBA សហរដ្ឋអាមេរិក​។ ​​នេះ​ជា​ជ័យជំនះ ៥ប្រកួត​ជាប់​គ្នា​សំរាប់ Golden State Warriors រដូវ​កាល​នេះ​។

​​ការប្រកួត​ចាប់​ផ្តើមដំបូង Atlanta Hawks បាន​នាំមុខ ១៥ពិន្ទុ​មុនពេល​ដែល Golden State វាយបក​ពីក្រោយ​នាំមុខ​វិញ ៤១-២០ ត្រឹម​វគ្គ​ទី៣ ដែល​ក្នុងចំណោម ៤១ពិន្ទុ Stephen Curry ម្នាក់ឯង​រកបាន ១៨ពិន្ទុ​។ ​កីឡាករ​វ័យ ៣៣ឆ្នាំ​រូបនេះ​បោះ​បាល់​ ៣​ពិន្ទុ​សំរេចបាន ៩លើក​ក្នុងចំណោម​ការប៉ុនប៉ង ១៩លើក​។ ​​ការរកបាន​ម្នាក់ឯង ៥០ពិន្ទុ​ក្នុង​មួយ​ប្រកួត​នេះ Stephen Curry បាន​ក្លាយជា​កីឡា​ករទី៣ ប៉ុណ្ណោះ​ក្នុង​ប្រវត្តិសាស្ត្រ​ក្រុម​បាល់បោះ Golden State បន្ទាប់ពី Wilt Chamberlian និង Rick Barry​។ ​​ចំណែក​ក្រុម​ចាញ់​ឯណោះ​វិញ​កីឡាករ Trae Young រកបាន ២៨ពិន្ទុ​ម្នាក់ឯង​ផងដែរ​តែ​មិនអាច​រារាំង Atlanta Hawks ពី​បរាជ័យ​បាន​។

​​ជ័យជំនះ​ធ្វើឱ្យ Golden State បន្ត​ការ​នាំមុខ​ក្នុង​តារាង​នៅ​ភាគ​ខាងលិច​ក្រោយ​ប្រកួត ១០លើក​ឈ្នះ៩ ចាញ់១ ខណៈ Atlanta Hawks ឈរ​លេខ ១២ ក្រោយ​ប្រកួត ១១លើក​ឈ្នះ៤ ចាញ់៧​។ ​​លទ្ធផល​ផ្សេងទៀត​មាន Chicago Bulls បញ្ចប់​ដំណើរ​មិន​ចាញ់ ៥ប្រកួត​ជាប់​គ្នា​របស់ Brooklyn Nets ក្រោយ​យកឈ្នះ ១១៨-៩៥ ក្នុងនោះ DeMar DeRozan រកបាន ២៨ពិន្ទុ​ម្នាក់ឯង​។ ​​ចំណែក LA Lakers ត្រលប់​រកបាន​ជ័យជំនះ​វិញ​ក្រោយ​យកឈ្នះ Charlotte Hornets ១២៦-១២៣ ប្រផិតប្រផើយ​ក្នុង​ម៉ោង​បន្ថែម​ដែល​ក្នុងនោះ Anthony Davis រកបាន ៣២ពិន្ទុ​ម្នាក់ឯង​៕

​អត្ថបទ​៖​នាង សុភា​វុ​ធ