ជនប៉ាឡេស្ទីនរាប់ម៉ឺននាក់ បានធ្វើដំណើរតាមផ្លូវធំឆ្ពោះទៅកាន់តំបន់ភាគខាងជើងហ្កាហ្សានាថ្ងៃចន្ទនេះ ពេលដែលអ៊ីស្រាអែលបើកផ្លូវបិទ ក្រោយក្រុមជីវពលហាម៉ាស់ ព្រមប្រគល់ចំណាប់ថ្នូរស្រីអ៊ីស្រាអែល Arbel Yehud និងចំណាប់ថ្នូរ ២នាក់ផ្សេងទៀត ។

អ្នកស្រី Umm ដូចគ្នានឹងពលរដ្ឋហ្កាហ្សាជម្លៀសខ្លួនផ្សេងទៀត ធ្វើដំណើរទៅកាន់តំបន់ភាគខាងជើងហ្កាហ្សាតាមផ្លូវធំ Wadi និយាយថា វាប្រៀបបាននឹងគាត់កើតម្តងទៀតដែរ ហើយពួកយើងទទួលបានជ័យជំនះម្តងទៀតហើយ ។

ក្រោមលក្ខខណ្ឌបទឈប់បាញ់ អ្នកស្រុកនៅតំបន់ភាគខាងជើងហ្កាហ្សា ត្រូវវិលត្រឡប់ទៅកាន់ផ្ទះរបស់ពួកគេវិញកាលពីចុងសប្តាហ៍នេះ ប៉ុន្តែអ៊ីស្រាអែល និយាយថា ក្រុមហាម៉ាស់ បានបំពានកិច្ចព្រមព្រៀង ដោយពុំបានដោះលែងចំណាប់ថ្នូរ Yehud ហើយពួកគេនឹងបន្តបិទច្រកឆ្លងកាត់ដដែល ។

កាលពីល្ងាចថ្ងៃអាទិត្យ ក្រុមអ្នកសម្របសម្រួលកាតា និយាយថា ក្រុមហាម៉ាស់ យល់ព្រមដោះលែងចំណាប់ថ្នូរ Yehud និងចំណាប់ថ្នូរ ២នាក់ផ្សេងទៀត មុនថ្ងៃសុក្រ ទី ៣១ ខែមករា ហើយអ៊ីស្រាអែលនឹងអនុញ្ញាតឲ្យជនប៉ាឡេស្ទីនវិលត្រឡប់ទៅកាន់តំបន់ភាគខាងជើងហ្កាហ្សាវិញ ដោយចាប់ផ្តើមពីព្រឹកថ្ងៃចន្ទនេះតទៅ ។

ចំណាត់ការរៀបចំឡើងដោយក្រុមអ្នកសម្របសម្រួលកាតា និងអេហ្ស៊ីបនេះដែរ នឹងអនុញ្ញាតឲ្យជនប៉ាឡេស្ទីនប្រហែល ៦៥ម៉ឺននាក់ នៅតំបន់ភាគកណ្តាល និងភាគខាងត្បូងហ្កាហ្សាស្រ្ទីប វិលត្រឡប់ទៅកាន់ផ្ទះរបស់ពួកគេវិញនៅភាគខាងជើង ដែលភាគច្រើននៃតំបន់មួយនេះ រងការបំផ្លិចបំផ្លាញគ្មានសេសសល់ដោយសារសង្រ្គាមរយៈពេល ១៥ខែ ពេលដែលអ៊ីស្រាអែល បើកការវាយប្រហារតាមច្រកអាកាស និងជើងគោក ។ 

យោងតាមការអះអាងរបស់ក្រសួងសុខាភិបាលហ្កាហ្សា បានឲ្យដឹងថា ជនប៉ាឡេស្ទីនជាង ៤៧.០០០នាក់ ត្រូវបានសម្លាប់ អំឡុងការវាយប្រហាររបស់អ៊ីស្រាអែល ៕