ប្រធានាធិបតីកេនយ៉ាលោក William Ruto កាលពីថ្ងៃអាទិត្យ បានជំរុញប្រធានាធិបតីរ៉្វាន់ដា និងកុងហ្គោឲ្យគោរពការអំពាវនាវសន្តិភាព ។

លោកនិយាយថា ក្រុមមេដឹកនាំប្លុកសហគមន៍អាហ្វ្រិកខាងកើត(EAC) បានឯកភាពគ្នា រៀបចំកិច្ចប្រជុំកំពូលវិសាមញ្ញ ដើម្បីលើកឡើងពីជម្លោះបច្ចុប្បន្ននៅតំបន់ភាគខាងកើតកុងហ្គោ ។

ក្រុមចលនាឧទ្ទាម ២៣ឧសភា(M23)ដែលត្រូវបានគេរាយការណ៍ថាគាំទ្រដោយរ៉្វាន់ដា បានរុលទៅមុខយ៉ាងលឿនក្នុងខែនេះ នៅតំបន់ព្រំដែនភាគខាងកើត និងជាតំបន់សម្បូរធនធានរ៉ែរបស់កុងហ្គោ ធ្វើឲ្យកើតមានក្តីបារម្ភថា ការប្រយុទ្ធគ្នាអាចនឹងក្លាយជាសង្រ្គាមក្នុងតំបន់ ។

ទោះបីជាយ៉ាងណាក៏ដោយ ប្រទេសរ៉្វាន់ដា បានច្រានចោលការចោទប្រកាន់របស់អង្គការសហប្រជាជាតិ(UN) និងប្រទេសផ្សេងទៀតថា ពួកគេគាំទ្រក្រុមឧទ្ទាម M23 ។

ក្រុមមេដឹកនាំ EAC ប្រឈមការងារលំបាកធំ ក្នុងការលើកឡើងពីជម្លោះនៅតំបន់ភាគខាងកើតសាធារណរដ្ឋប្រជាធិបតេយ្យកុងហ្គោ ។

ថ្វីត្បិតមានកិច្ចប្រជុំកំពូលជាច្រើន និងបណ្តើមគំនិតសន្តិភាពយ៉ាងណាក្តី កិច្ចខិតខំរបស់ពួកគេ តែងតែរងការរិះគន់ឥតឈប់ឈរ សម្រាប់កង្វះខាតប្រសិទ្ធិភាព និងការខកខាតបង្កើតដំណោះស្រាយយូរអង្វែង ។

រយៈពេល ៣ឆ្នាំនៃការបះបោររបស់ពួកគេ ក្រុមឧទ្ទាម M23 បច្ចុប្បន្នបានគ្រប់គ្រងដែនដីកុងហ្គោកាន់ច្រើនជាងពេលមុន ហើយពួកគេសន្យាថា នឹងដណ្តើមគ្រប់គ្រងឲ្យបានទីក្រុង Goma ដែលជារដ្ឋធានីខេត្ត North Kivu និងជាទីក្រុងមានពលរដ្ឋរស់នៅប្រហែលជាង ១លាននាក់ ៕