នៅក្នុងព្រះវិហារតូចមួយកន្លែងស្ថិតក្នុងទីក្រុង Goma ក្រុមជំនឿសាសនាកាតូលិក បានជួបជុំគ្នាកាលពីល្ងាចថ្ងៃអាទិត្យ ដើម្បីសូត្រព្រះគម្ពី និងបួងសួងឲ្យមានសន្តិភាព ស្របពេលដែលជម្លោះបានផ្ទុះឡើងនៅក្រៅទីក្រុងមួយនេះ ។

លោក Yvone Bitisho គឺជាអ្នកកាន់សាសនាកាតូលិកក្នុងស្រុកមួយរូប និយាយថា ពួកយើងមកទីនេះ ដើម្បីបួងសួងដោយមានជំនឿទុកចិត្តលើព្រះជាម្ចាស់ថានឹងជួយពួកយើងឆ្លងកាត់ពេលវេលាជួបបញ្ហាទាំងអស់នេះ ។

នៅក្រៅព្រះវិហារ មនុស្សជម្លៀសខ្លួនក្នុងប្រទេសរាប់សិបនាក់មកពីជំរំនៅទីក្រុង Munigi, Kanyarutshinya និងទីក្រុង Kibati បានស្វែងរកទីជម្រក រត់ភៀសខ្លួនទៅកាន់ទីក្រុង Goma ពេលដែលក្រុមឧទ្ទាម M23 វាយប្រហារទីតាំងឈរជើងរបស់យោធាកុងហ្គោនៅជុំវិញទីក្រុង ។

អំពើហិង្សាកំពុងកើតឡើងរវាងកងទ័ពកុងហ្គោ និងក្រុមឧទ្ទាមគាំទ្រដោយរ៉្វាន់ដាយោងតាមការអះអាងរបស់ទីក្រុង Kinshasa បានធ្វើឲ្យទីក្រុង Goma និងតំបន់ជុំវិញ ស្ថិតក្នុងភាពភ័យខ្លាច និងពុំច្បាស់លាស់ ។

ក្រុមបះបោរ M23ដែលបង្កើនសកម្មភាបរបស់ពួកគេស្ទើរតែពេញមួយខែមករានេះ ត្រូវបានគេមើលឃើញពួកគេដណ្តើមបានដែនដីកាន់តែច្រើនជាងមុន ក្នុងនោះទីក្រុង Goma ស្ថិតក្នុងហានិភ័យនៃការក្លាយជាសមភូមិប្រយុទ្ធដ៏ខ្លាំងក្លា ។

កាលពីថ្ងៃអាទិត្យម្សិលមិញ ទាហាន ១៣នាក់ ដែលបម្រើការជាមួយកងកម្លាំងថែរក្សាសន្តិភាពនៅ កុងហ្គោ ត្រូវបានសម្លាប់នៅក្នុងការប៉ះទង្គិចគ្នាជាមួយឧទ្ទាមមកពីក្រុមឧទ្ទាម M23 ។

យោធាអាហ្វ្រិកខាងត្បូង និយាយថា ទាហានរបស់ខ្លួន៩នាក់ បានស្លាប់ អំឡុងពេលរុញច្រានការមកដល់របស់ក្រុមឧទ្ទាមនៅទីក្រុង Goma ស្ថិតនៅភាគខាងកើតកុងហ្គោ ខណៈទាហាន ម៉ាឡាវី ៣នាក់ និងទាហានអ៊ុយរុយហ្គាយម្នាក់ ត្រូវបានសម្លាប់ផងដែរ ៕