អ្នកនាំពាក្យកងទ័ព លោក Edward Buba បាននិយាយថា យ៉ាងហោចណាស់ទាហាន 22នាក់ ត្រូវបានបានសម្លាប់ និងជាច្រើននាក់ទៀត បានរងរបួស នៅភាគឦសានប្រទេសនីហ្សេរីយ៉ា បន្ទាប់ពីក្រុមបះបោរបានដាក់ពង្រាយឧបករណ៍បំផ្ទុះ និងគ្រាប់បែកអត្តឃាត ដើម្បីរារាំងការវាយប្រហារដោយយោធា។

យោធានីហ្សេរីយ៉ា កាលពីល្ងាចថ្ងៃអាទិត្យ (ទី២៦ ខែមករា) បានឲ្យដឹងថា ខ្លួនបានបើកការវាយប្រហារកាលពី ១០ថ្ងៃមុន ប្រឆាំងនឹងពួកបះបោរនៅភាគឦសាន ហើយបានសម្លាប់ពួកសកម្មប្រយុទ្ធជាង ៧០នាក់ ក្នុងនោះមានរួមទាំងមេបញ្ជាការ ៣រូបផងដែរ។ ហើយលោក Buba បានប្រាប់បន្ថែមថា កងកម្លាំងរដ្ឋាភិបាល ក៏បានបាញ់ទម្លាក់យានដ្រូនដែលប្រើប្រាស់ដោយពួកបះបោរផងដែរ។

គួរបញ្ជាក់ថា ក្រុមសកម្មប្រយុទ្ធ Boko Haram និងខេត្តអាហ្រ្វិកខាងលិចរបស់រដ្ឋឥស្លាម (ISWAP) បានប្រតិបត្តិការជាចម្បងនៅក្នុងរដ្ឋ Borno ដោយផ្តោតលើកងកម្លាំងសន្តិសុខ និងជនស៊ីវិល ជាការបះបោរដែលបានសម្លាប់មនុស្ស និងបង្ខំឲ្យមានជនភៀសខ្លួនរាប់ម៉ឺននាក់។

យោងតាមប្រភពសន្តិសុខ និងអ្នកស្រុកក្នុងតំបន់ បានឲ្យដឹងថា កាលពីថ្ងៃសុក្រចុងសប្ដាហ៍កន្លងមក ជនសង្ស័យជាក្រុមបះបោរឥស្លាមនិយម បានសម្លាប់ទាហាននីហ្សេរីយ៉ាយ៉ាងតិច ២០នាក់ ក្នុងនោះរួមទាំងមេបញ្ជាការម្នាក់ផងដែរ អំឡុងមានការវាយប្រហារលើមូលដ្ឋានទ័ពមួយកន្លែង នៅក្នុងទីក្រុងដាច់ស្រយាលមួយរបស់រដ្ឋ Borno។

អំពើបះបោររបស់ក្រុមឥស្លាមនិយម បានញាំញីនៅភាគឦសាននៃប្រទេសដែលមានប្រជាជនច្រើនជាងគេបំផុតរបស់ទ្វីបអាហ្រ្វិកអស់រយៈពេល ១៦ឆ្នាំមកហើយ ខណៈដែលអំពើចាប់ជំរិត និងឆក់ប្លន់ កំពុងកើតមាននៅភាគពាយព្យ ហើយអំពើហិង្សារបស់ក្រុមអន្ធពាល និងក្រុមបំបែកខ្លួន គឺជារឿងកើតមានឡើងធម្មតា នៅភាគអាគ្នេយ៍៕