ប្រធានាធិបតីអាមេរិកលោក Donald Trump បានប្រាប់អ្នកយកព័ត៌មានកាលពីថ្ងៃចន្ទ (២៧ មករា) ថា ក្រុមហ៊ុនបច្ចេកវិទ្យាខ្នាតយក្ស Microsoft កំពុងពិភាក្សាដើម្បីទិញយកបណ្ដាញសង្គម TikTok ហើយថាលោកចង់មើលឃើញសង្រ្គាមដេញថ្លៃលើកម្មវិធីនេះ។ ទាំងក្រុមហ៊ុន Microsoft និង TikTok មិនបានឆ្លើយតបភ្លាមៗចំពោះសំណើសុំការធ្វើអត្ថាធិប្បាយទេ។

លោក Trump ធ្លាប់បាននិយាយថា លោកកំពុងពិភាក្សាជាមួយភាគីជាច្រើនអំពីការទិញ TikTok ហើយរំពឹងថានឹងធ្វើការសម្រេចចិត្តលើអនាគតរបស់កម្មវិធីនេះ ក្នុងរយៈពេល ៣០ថ្ងៃខាងមុខ។

កម្មវិធីដែលមានអ្នកប្រើប្រាស់ជនជាតិអាមេរិកប្រហែល ១៧០លាននាក់នេះ ត្រូវបានបិទដំណើរការមួយរយៈពេលខ្លី មុនពេលច្បាប់ដែលតម្រូវឱ្យក្រុមហ៊ុនមេមានមូលដ្ឋាននៅចិន ByteDance លក់អេប ដោយហេតុផលសន្តិសុខជាតិ ឬប្រឈមការហាមឃាត់ ដែលបានចូលជាធរមាននៅថ្ងៃទី១៩ ខែមករា។

លោក Trump បន្ទាប់ពីចូលកាន់តំណែងនៅថ្ងៃទី២០ ខែមករា បានចុះហត្ថលេខាលើបទបញ្ជាប្រតិបត្តិដែលពន្យារពេល ៧៥ថ្ងៃនៃការអនុវត្តច្បាប់ហាមប្រាម ដែលត្រូវបានដាក់ឱ្យដំណើរការ បន្ទាប់ពីមន្រ្តីអាមេរិក ព្រមានថាមានហានិភ័យនៃទិន្នន័យរបស់ជនជាតិអាមេរិក ត្រូវបានប្រើប្រាស់ក្នុងផ្លូវខុសនៅក្រោមក្រុមហ៊ុនមេ ByteDance៕