រដ្ឋបាលខណ្ឌសែនសុខទុករយៈពេល៧ថ្ងៃ តម្រូវឲ្យលោក​ស្រី អ៊ឹង សាវណ្ណ ត្រូវ រុះរើ​ជា​បន្ទាន់​នូវ​សំណង់​ឃ្លាំង​ដែក​ដែលលួចសាងសង់ខុសច្បាប់នៅផ្លូវសាធារណៈ ដែលមានទីតាំងនៅ​លើ​ក្បាល​ដី​លេខ​៥០៩ និង៥១០ ភូមិទ្រុងមាន់ សង្កាត់អូរបែកក្អម ខណ្ឌសែនសុខ រាជធានីភ្នំពេញ ។  

ក្នុងករណីលោកស្រីម្ចាស់សំណង់ មិនព្រមអនុវត្តតាមខ្លឹមសារខាងលើទេ រដ្ឋបាល​ខណ្ឌនឹ​ង​ចាត់​វិធាន​ការ​រដ្ឋបាល ចុះរុះរើសំណង់ ព្រមទាំងចាត់វិធានការច្បាប់ជាធរមាន ។

អាជ្ញាធរខណ្ឌសែនសុខ នាព្រឹកថ្ងៃទី២៨ ខែមករា ឆ្នាំ២០២៥ ប្រាប់ឲ្យដឹងថា បញ្ហា​សំណង់​ឃ្លាំង​ដែក​ខុស​ច្បាប់​លួចសាងសង់លើផ្លូវសាធារណៈរបស់លោកស្រី អ៊ឹង សាវណ្ណ ដែល​មាន​ទី​តាំង​នៅ​លើ​ក្បាល​ដី​លេខ៥០៩ និង៥១០ ភូមិទ្រុងមាន់ សង្កាត់អូរបែកក្អម ខណ្ឌសែនសុខ រាជធានី​ភ្នំពេញ ​រដ្ឋបាលខណ្ឌខណ្ឌសែនសុខ បានធ្វើធ្វើលិខិតជូនដំណឹងតម្រូវឲ្យរុះរើកន្លងទៅ គឺមាន ចំនួន ៣លើករួចមកហើយ គិតចាប់ពីអំឡុងឆ្នាំ២០២១ មកម៉្លេះ បន្តបន្ទាប់រហូតដល់ឆ្នាំ២០២៤ ប៉ុន្តែ​មិន​ត្រូវបានម្ចាស់សំណង់អនុវត្តឡើយ ។ ចំពោះបញ្ហានេះ ម្ចាស់សំណង់ខុសច្បាប់ ក៏បាន​ដាក់​លិខិតស្នើទៅដល់ក្រសួងរៀបចំដែនដី នគរូបនីយកម្ម និង សំណង់ ដើម្បីពន្យាការរុះរើ តែ​ខាង​ក្រសួង មិនទទួលសំណើរនេះឡើយ ។

អាជ្ញាធរខណ្ឌសែនសុខ ប្រាប់បន្តថា ដោយសារករណីនេះចេះតែបន្តអូសបន្លាយយូរ រដ្ឋបាល​ខណ្ឌ​​សែនសុខ ចុះហត្ថលេខា ដោយលោក ម៉ូវ ម៉ានិត អភិបាល នៃ គណៈ​អភិបាល​ខណ្ឌ​សែនសុខ បានធ្វើលិខិតជូនដំណឹងតម្រូវឲ្យម្ចាស់រុះរើម្តងទៀត កាលពីថ្ងៃ២៧ ខែមករា ឆ្នាំ​២០២៥ សរុបទាំងអស់ ៤លើក នេះជាលើកចុងក្រោយហើយ ។

ជាថ្មីម្តងទៀត រដ្ឋបាលខណ្ឌសែនសុខ តម្រូវអោយលោកស្រី អ៊ឹង សាវណ្ណ សូមធ្វើ​ការ​រុះរើ​ជា​បន្ទាន់​​នូវ​​សំណង់ឃ្លាំងដែកដែលសាងសង់លើផ្លូវសាធារណៈក្នុងរយៈពេល ៧ថ្ងៃ ចាប់​ពី​ថ្ងៃ​ទទួល​បាន​លិខិត​ជូនដំណឹងជា លើកចុងក្រោយកាលពីថ្ងៃ២៧ ខែមករា ឆ្នាំ២០២៥ នេះ តទៅ ។ ក្នុង​ករណី​លោកស្រី មិនអនុវត្តតាមខ្លឹមសារខាងលើទេ រដ្ឋបាលខណ្ឌ​នឹង​ចាត់​វិធានការ​រដ្ឋបាល​ចុះ​រុះ​រើ​សំណង់ ព្រមទាំងចាត់វិធានការច្បាប់ជាធរមាន ។

អាជ្ញាធរខណ្ឌសែនសុខបញ្ជាក់ថា សំណង់ខុសច្បាប់របស់លោកស្រី អ៊ឹង សាវណ្ណ ដែលលួច​សាង​សង់​លើ​ផ្លូវ​សាធារណៈ នៅភូមិទ្រុងមាន់ សង្កាត់អូរបែកក្អម ខណ្ឌសែនសុខ រាជធានីភ្នំពេញ មាន​ប្រវែង​ទទឹង ៨ម៉ែត្រ និងបណ្តោយ ៣២ម៉ែត្រ៕ តារាវុទ្ធី