ប្រធានាធិបតីអ៊ុយក្រែនលោក វ្ល៉ូឌីមី ហ្សេឡិនស្គី (Volodymyr Zelensky) បាននិយាយកាលពីថ្ងៃចន្ទថា ភាពតឹងតែងនៃសង្រ្គាមជិតបីឆ្នាំ មិនអនុញ្ញាតឲ្យមានការកែប្រែច្បាប់កេណ្ឌទ័ពទេ ពីព្រោះប្រសិនបើទាហានជាច្រើន ចាកចេញទៅផ្ទះរបស់ពួកគេ ប្រធានាធិបតីរុស្ស៊ីលោក វ្ល៉ាឌីមី ពូទីន (Vladimir Putin)   «នឹងសម្លាប់យើងទាំងអស់គ្នា»។

លោក ហ្សេឡិនស្កី បានប្រាប់អ្នកសារព័ត៌មានអ៊ីតាលី អ្នកស្រី Cecilia Sala ដែលត្រូវបានដោះលែងក្នុងខែនេះ បន្ទាប់ពីត្រូវបានឃុំខ្លួនអស់រយៈពេល ២១ថ្ងៃ នៅក្នុងប្រទេសអ៊ីរ៉ង់ថា ការខាតបង់នៃសង្រ្គាមលើប្រជាជនអ៊ុយក្រែន និងក្រុមគ្រួសាររបស់ពួកគេ បានគូសបញ្ជាក់អំពីតម្រូវការ គឺបញ្ចប់ជម្លោះនេះ ឲ្យ   បានឆាប់តាមដែលអាចធ្វើទៅបាន។

សភាបានអនុម័តច្បាប់កេណ្ឌទ័ពថ្មី កាលពីឆ្នាំមុន ដើម្បីបង្កើនចំនួនអ្នកឈរជើងនៅជួរមុខ ប៉ុន្តែកងកម្លាំងប្រយុទ្ធរបស់អ៊ុយក្រែន នៅតែមានចំនួនតិចជាងដោយទាហានរបស់រុស្ស៊ី។

លោក ហ្សេឡិនស្គី បានថ្លែងនៅក្នុងបទសម្ភាសដែលត្រូវបានបង្ហោះនៅលើបណ្តាញ Telegram របស់ប្រធានាធិបតីថា៖«ស្ថានភាពក្នុងសម័យសង្រ្គាម ទាមទារឲ្យមានការប្រមូលផ្តុំមនុស្ស និងធនធានទាំងអស់ ដែលយើងមាននៅក្នុងប្រទេស»។ 

លោក ហ្សេឡិនស្គី បាននិយាយថា៖«ជាអកុសល នោះគឺជាបញ្ហាប្រឈមនៃសង្រ្គាមនេះ ហើយនោះ គឺជាមូលហេតុ ដែលយើងត្រូវពន្លឿនអ្វីៗ ឲ្យដល់កម្រិតអតិបរមា ដើម្បីបង្ខំឲ្យរុស្ស៊ីបញ្ចប់សង្រ្គាមនេះ»។