សេតវិមាន បានឲ្យដឹងថា ប្រធានាធិបតីអាមេរិក លោក ដូណាល់ ត្រាំ បានសង្កត់ធ្ងន់លើសារៈសំខាន់នៃការទិញឧបករណ៍សន្តិសុខ ដែលផលិតដោយអាមេរិកបន្ថែមទៀត ហើយឆ្ពោះទៅរកទំនាក់ទំនងពាណិជ្ជកម្មទ្វេភាគីដោយយុត្តិធម៌ នៅក្នុងការសន្ទនាតាមទូរស័ព្ទ ជាមួយលោកនាយករដ្ឋមន្រ្តី ណារិនដ្រា ម៉ូឌី (Narendra Modi) កាលពីថ្ងៃចន្ទ។

នៅក្នុងអ្វីដែលសេតវិមាន ហៅថា «ការសន្ទនាប្រកបដោយផលិតភាព» មេដឹកនាំទាំងពីរ បានពិភាក្សាគ្នា អំពីការពង្រីក និងធ្វើឲ្យកាន់តែស៊ីជម្រៅនូវកិច្ចសហប្រតិបត្តិការ និងបញ្ហាក្នុងតំបន់ រួមទាំងសន្តិសុខ នៅឥណ្ឌូប៉ាស៊ីហ្វិក មជ្ឈិមបូព៌ា និងអឺរ៉ុប។

សេតវិមាន បានបន្តថា ពួកគេក៏បានពិភាក្សាអំពីផែនការសម្រាប់លោក ម៉ូឌី ដើម្បីធ្វើទស្សនកិច្ច នៅសហរដ្ឋអាមេរិក ដោយ «គូសបញ្ជាក់ភាពរឹងមាំនៃទំនាក់ទំនងមិត្តភាព និងយុទ្ធសាស្ត្ររវាងប្រទេសទាំងពីរ»។

សារព័ត៌មានរ៉យទ័រ បានរាយការណ៍កាលពីសប្តាហ៍មុនថា អ្នកការទូតឥណ្ឌា និងសហរដ្ឋអាមេរិក កំពុងព្យាយាមរៀបចំកិច្ចប្រជុំរបស់មេដឹកនាំទាំងពីរ នៅដើមខែកុម្ភៈ។

សេចក្តីថ្លែងការណ៍របស់សេតវិមាន បានលើកឡើងថា៖«លោកប្រធានាធិបតី បានសង្កត់ធ្ងន់លើសារៈសំខាន់របស់ឥណ្ឌា ក្នុងការបង្កើនការទិញឧបករណ៍សន្តិសុខ ដែលផលិតដោយអាមេរិក និងឆ្ពោះទៅរកទំនាក់ទំនងពាណិជ្ជកម្មទ្វេភាគីដោយយុត្តិធម៌»។ 

សហរដ្ឋអាមេរិក គឺជាដៃគូពាណិជ្ជកម្មដ៏ធំបំផុតរបស់ឥណ្ឌា ហើយពាណិជ្ជកម្មទ្វេភាគីរវាងប្រទេសទាំងពីរបានកើនឡើងលើសពី ១១៨ ពាន់លានដុល្លារ ក្នុងឆ្នាំ ២០២៣/២៤ ដោយឥណ្ឌា បានប្រកាសអតិរេកពាណិជ្ជកម្មចំនួន ៣២ ពាន់លានដុល្លារ។