ភ្នំពេញ៖ យោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ បានបង្ហាញឲ្យឃើញថា ការនាំចូលជីកសិកម្មគិតចាប់ពីខែមករា រហូតដល់ខែតុលា ឆ្នាំ២០២១ មានជាង ១,៦ លានតោន កើនឡើងជិត៤០ម៉ឺនតោន ប្រៀបធៀបនឹងរយៈពេលដូចគ្នាទៅនឹងឆ្នាំ២០២០ ដែលមានចំនួនជាង ១,២លានតោន។
លោក ភុំ រ៉ា ប្រធាននាយកដ្ឋាននិតិកម្មកសិកម្ម នៃក្រសួងកសិកម្ម រុក្ខាប្រមាញ់ និងនេសាទ នៅព្រឹកថ្ងៃទី១០ ខែវិច្ឆិកា ឆ្នាំ២០២១នេះ បានមានប្រសាសន៍ប្រាប់ទូរទស្សន៍ព័ត៌មាន ប៊ីធីវី ថា ផលិតកម្មក្នុងវិស័យកសិកម្មនៅកម្ពុជាឆ្នាំនេះបានពិនិត្យឃើញថា មានសន្ទុះកើនឡើងគួរឲ្យកត់សម្គាល់ ដែលជំរុញឱ្យមានតម្រូវការជីកសិកម្ម មានសន្ទុះផងដែរ។
ទាក់ទិនការកើនឡើងតម្លៃជីនាំចូលខ្ពស់ លោកបានពន្យល់ថា ដោយសារកត្តាសំខាន់ៗមួយចំនួន ដូចជា នៅបណ្តាប្រទេសផលិតថ្នាំកសិកម្ម និងជីកសិកម្មនាំចេញ មិនអាចផលិតឆ្លើយតបបានតាមការបញ្ជាទិញពីប្រទេសកម្ពុជា, វត្ថុធាតុដើមមានការខ្វះខាតក្នុងការផ្គត់ផ្គង់ពីប្រទេសផលិតធំៗ ដូចជាប្រទេសចិន ម៉ាឡេស៊ី និងប្រទេសអារ៉ាប់, ផលិតកម្មជីកសិកម្មត្រូវបានកាត់បន្ថយកម្លាំងពលកម្ម និងការដឹកជញ្ជូនប្រើពេលវេលាយូរ ដោយសារបញ្ហារីករាលដាលជំងឺកូវីដ១៩ជាដើម-ល-។
លោក ផាន់ ណារុំ ប្រធានផ្នែកលក់នៃក្រុមហ៊ុន Bayon Heritage Holding Group ដែលជាក្រុមហ៊ុននាំចូល និងចែកចាយជីកសិកម្មជប៉ុនសញ្ញាផែនដី បានឲ្យដឹងថា ទទួលស្គាល់ថា តម្លៃជីនាំចូលឡើងថ្លៃ ក្នុងឆ្នាំ២០២១នេះ ប៉ុន្តែបើនិយាយដល់តម្រូវការប្រើប្រាស់ ជីក្នុងស្រុកវិញ ក៏មិនមានច្រើនដូចឆ្នាំកន្លងៗទៅដែរ ដោយសារតម្លៃជីកើនខ្ពស់។
យោងតាមក្រសួងកសិកម្ម រុក្ខាប្រមាញ់ និងនេសាទ ក្នុងឆ្នាំ២០២០កន្លងទៅ ក្រុមហ៊ុននាំចូលថ្នាំ កសិកម្មមានចំនួនសរុបជាង ៤៧ ០០០តោន និងជីកសិកម្មចំនួនសរុបជាង ១លាន ៤សែនតោន៕ អត្ថបទ៖ ឈិត បូរ៉ាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
