ប្រធានាធិបតីអាមេរិក លោក Donald Trump កាលពីថ្ងៃចន្ទ (ទី២៧ ខែមករា) បាននិយាយថា លោកគ្រោងនឹងដំឡើងពន្ធលើដែកថែប អាលុយមីញ៉ូម និងទង់ដែងដែលនាំចូលទៅកាន់សហរដ្ឋអាមេរិក ក៏ដូចជាទំនិញផ្សេងៗទៀត ដូចជាបន្ទះឈីបកុំព្យូទ័រ បន្ទះអេឡិចត្រូនិក និងឱសថ ដែលជាកិច្ចប្រឹងប្រែងជំរុញដល់ការបង្កើនផលិតកម្មផលិតផលរបស់សហរដ្ឋអាមេរិក។

លោក Trump បានប្រកាសពីចំណាត់ការនេះ អំឡុងពេលថ្លែងសុន្ទរកថា នៅឯការជួបជុំសមាជិកសភារបស់គណបក្សសាធារណរដ្ឋ ក្នុងសណ្ឋាគារ Trump National Doral និងក្លឹបវាយកូនហ្គោល ក្នុងទីក្រុង Miami។

ដោយប្រៀបធៀបវិធីសាស្រ្តរបស់លោក ក្នុងការយកពន្ធយ៉ាងតឹងរ៉ឹង ដែលត្រូវបានជំរុញកាលពីជាង ១សតវត្សរ៍មុនដោយអតីតប្រធានាធិបតី លោក William McKinley លោក Trump បាននិយាយថា៖ «វាដល់ពេលហើយ ក្នុងការធ្វើឲ្យសហរដ្ឋអាមេរិកត្រលប់ទៅកាន់ប្រព័ន្ធដែលធ្វើឲ្យយើងក្លាយជាប្រទេសអ្នកមានស្ដុកស្ដម្ភ និងមានឥទ្ធិពលជាងមុន»។

យ៉ាងណាក្ដី អ្នកសេដ្ឋកិច្ចព្រមានថា ការដំឡើងពន្ធ ដែលជាការយកពន្ធលើការនាំចូលពីបរទេស អាចនាំឲ្យតម្លៃទំនិញឡើងថ្លៃខ្ពស់ សម្រាប់អ្នកប្រើប្រាស់។ លោក Trump បានធ្វើយុទ្ធនាការបោះឆ្នោតដោយសន្យាថា នឹងកាត់បន្ថយអតិផរណា។ ប៉ុន្តែមួយសប្តាហ៍នៃការចូលកាន់តំណែងអាណត្តិទី២ របស់លោក លោក Trump បានបង្ហាញថា លោកមានគម្រោងប្រើប្រាស់ការដំឡើងពន្ធគយដែលជាគោលនយោបាយផ្ទាល់ខ្លួនមានតាំងពីអាណត្តិដំបូងរបស់លោក ជាឧបករណ៍មួយ ដើម្បីសម្រេចបានទាំងគោលបំណងគោលនយោបាយការបរទេសរបស់លោក និងរបៀបវារៈក្នុងស្រុក។

លោក Trump បានប្រាប់ថា៖ «ការដំឡើងពន្ធនឹងមានលើការនាំចូលដែកថែប ទង់ដែង និងអាលុយមីញ៉ូម ហើយនិងអ្វីៗដែលយើងត្រូវការ សម្រាប់យោធារបស់យើង»៕