ឯកអគ្គរដ្ឋទូតអ៊ីស្រាអែលប្រចាំនៅទីក្រុងមូស្គូ លោកស្រី Simona Halperin បានប្រាប់សារព័ត៌មាន TASS ថា អ៊ីស្រាអែលត្រៀមខ្លួនជាស្រេច ក្នុងការសហការជាមួយរុស្ស៊ី ដើម្បីស្ដារឡើងវិញនូវហេដ្ឋារចនាសម្ព័ន្ធ  សំខាន់ៗ នៅក្នុងតំបន់ហ្កាហ្សាស្ទ្រីប។

លោកស្រី បាននិយាយថា៖«យើងកំពុងធ្វើការជាមួយរុស្ស៊ីក្នុងវិស័យជាច្រើន។ ខ្ញុំគិតថាយើងអាចធ្វើការរួមគ្នា ដើម្បីស្តារតំបន់ហ្កាហ្សាស្ទ្រីបឡើងវិញ ដោយមើលឃើញថា យើងបានសហការរួចហើយជាមួយ   រុស្ស៊ី នៅពេលដែលយើង បានជួយប្រទេសនេះផ្តល់ជំនួយផ្នែកវេជ្ជសាស្រ្ត និងមនុស្សធម៌ ដល់តំបន់ហ្កា ហ្សាស្ទ្រីប»។

នាយករដ្ឋមន្ត្រី និងជារដ្ឋមន្ត្រីការបរទេសកាតា លោក Mohammed bin Abdulrahman Al Thani បាននិយាយកាលពីល្ងាចថ្ងៃទី ១៥ ខែមករាថា ដោយសារមានកិច្ចខិតខំប្រឹងប្រែងសម្របសម្រួលរបស់ប្រទេសអេហ្ស៊ីប កាតា និងសហរដ្ឋអាមេរិក អ៊ីស្រាអែល និងក្រុមហាម៉ាស បានឈានដល់កិច្ចព្រមព្រៀង បទឈប់បាញ់ នៅតំបន់ហ្កាហ្សាស្ទ្រីប និងការដោះលែងចំណាប់ថ្នូរ ដែលត្រូវបានឃុំខ្លួន នៅក្នុងទឹកដីនេះ។  ក្នុងអំឡុងដំណាក់កាល ៤២ ថ្ងៃដំបូងនៃកិច្ចព្រមព្រៀងនេះ ក្រុមហាម៉ាស នឹងដោះលែងចំណាប់ថ្នូរ ៣៣ នាក់ ជាថ្នូរនឹងការដោះលែងអ្នកទោសប៉ាឡេស្ទីនរាប់រយនាក់។ កិច្ចព្រមព្រៀងនេះ ចូលជាធរមាន នៅថ្ងៃទី ១៩ ខែមករា។ នៅថ្ងៃដដែលនោះ ស្ត្រីជនជាតិអ៊ីស្រាអែលបីនាក់ ត្រូវបានត្រឡប់ទៅផ្ទះវិញ។ ជាលទ្ធផល អ៊ីស្រាអែលបានដោះលែងស្ត្រី និងក្មេងជំទង់ប៉ាឡេស្ទីន ៩០នាក់ ពីពន្ធនាគាររបស់ខ្លួន កាលពីព្រឹកថ្ងៃទី ២០ ខែមករា។

នៅថ្ងៃទី ២៥ ខែមករា ស្ត្រីជនជាតិអ៊ីស្រាអែល ៤នាក់ទៀត ត្រូវបានដោះលែងពីការជាប់ឃុំឃាំង នៅតំបន់ហ្កាហ្សាស្ទ្រីប ហើយអ៊ីស្រាអែល បានដោះលែងអ្នកទោសប៉ាឡេស្ទីនចំនួន ២០០នាក់។ ពួកគេចំនួន ១១៤ នាក់ បានមកដល់តំបន់វេសបែង ( West Bank) ១៦នាក់ បានត្រឡប់ទៅតំបន់ហ្កាហ្សា ហើយ ៧០នាក់ទៀត ត្រូវបាននិរទេស ទៅប្រទេសអេហ្ស៊ីប។