​បាល់ទាត់៖ ​ក្រុមបាល់ទាត់​ជំរើសជាតិ​ព័រទុយហ្កាល់​ បានធ្វើការ​ប្រមូលផ្តុំ​ហ្វឹកហាត់​នៅ​ថ្ងៃ​ពុធ​ម្សិលមិញ​នេះ មុន​ការប្រកួត​ជាមួយ​នឹង​សាធារណរដ្ឋ​អៀក​ឡង់​នៅ​ទីក្រុង Dublin យប់​ថ្ងៃ​ព្រហស្បតិ៍​នេះ​។ ​​ក្រុម​របស់លោក Fernando Santo កំពុង​ឈរ​លេខ ២ ក្នុង​ពូ​ល A នេះ​ដោយ​ដេញ​ពីក្រោយ​ស៊ែ​ប ១ពិន្ទុ ​តែ​ជ័យជំនះ​យប់​នេះ​នឹង​ធ្វើឱ្យ​ព័រទុយហ្កាល់​ឡើងមក​នាំមុខគេ​វិញ​បាន ​ខណៈ​ស៊ែ​ប​ប្រកួត​លើស​មួយ​ប្រកួត​។

​​Cristiano Ronaldo ក៏មាន​វត្តមាន​ក្នុងការ​ហ្វឹកហាត់​នេះដែរ តែ​ខ្សែប្រយុទ្ធ​ស្លាប Bernardo Silva របស់ Manchester City មិនឃើញ​មាន​វត្តមាន​ក្នុងការ​ហ្វឹកហាត់​នេះឡើយ​ដោយសារ​របួស​សាច់ដុំ​។​ ​​ក្រោយពី​ប្រកួត​យប់​នេះ ព័រទុយហ្កាល់​នឹងត្រូវ​ជួប​ស៊ែ​ប​នៅ​ប្រកួត​ចុងក្រោយ​នៅ​ថ្ងៃអាទិត្យ​ក្នុង​ទីក្រុង Lisbon ប្រទេស​ព័រទុយហ្កាល់​ដើម្បី​រក​ក្រុម​ណា​ជា​ក្រុម​លេខ ១ ក្នុង​ពូ​ល​មាន​កៅអី​ស្វ័យប្រវត្តិ​នៅ FIFA World Cup ២០២២ ប្រទេស​កាតា​ ខណៈ​ក្រុម​លេខ ២ ត្រូវ​ផ្ទឹម​ជាមួយ​ក្រុម​លេខ ២ ផ្សេងទៀត​ដើម្បី​រក​ក្រុម​លេខ ២ ល្អ​បំផុត​។​ ​​គិត​មក​ដល់ពេលនេះ​ព័រទុយហ្កាល់​ឈ្នះ ៥ប្រកួត​ជាប់​គ្នា​រួចមកហើយ​ដែល​ក្នុងនោះ​រួមមាន​ស៊ុត​បញ្ចូល​ទី​គេ ១៦គ្រាប់​របូត​តែ ២គ្រាប់​ប៉ុណ្ណោះ​។ ​ចុងក្រោយ​បំផុត​របស់​ព័រទុយហ្កាល់​គឺ​យកឈ្នះ​លុច​ហ្សាំ​បួរ ៥-០ ខណៈ Cristiano Ronaldo រកបាន ៣គ្រាប់​ម្នាក់ឯង​ក្លាយជា​កីឡាករ​ដំបូង​ដែល​ធ្វើបាន Hat-Trick ១០លើក​ឱ្យ​ក្រុម​ជំរើសជាតិ​៕

​អត្ថបទ​៖​នាង សុភា​វុ​ធ