​បាល់ទាត់៖ ​ខ្សែ​ប្រយុទ្ធ​វែល Gareth Bale បានតែ​ត​បញ្ចប់​បញ្ចូល​ទី​គ្រាប់​ជ័យជំនះ​ឲ្យ Tottenham Hotspur យកឈ្នះ Brighton ២–១ ដែល​ជា​គ្រាប់​ដំបូង​របស់​គេ​តាំងពី​វិល​មកកាន់ Spurs វិញ​។ ​ខ្សែ​ប្រយុទ្ធ​អង់គ្លេស Harry Kane ជា​អ្នក​បើក​ការ​នាំ​មុខ​ឲ្យ Spurs នៅ​នាទី​ទី​១៣ ដោយ​បាល់​ពិន័យ ១១​ម៉ែត្រ​ក្រោយ​កំហុស​របស់ Adam Lallana​ ក្រោយ​ពិនិត្យ​ឡើង​វិញ​ដោយ VAR​។ នេះ​ជា​គ្រាប់​ទី​១៤៩ របស់ Harry Kane នៅ English Premier League​។

​​តែ​វគ្គ​ទី​២ Brighton ក៏​តាម​ស្មើ​វិញ​នៅ​នាទី​ទី​៥៦ ដោយ Tariq Lamptey ដែល​ជា​គ្រាប់​ដ៏​ចម្រូង​ចម្រាស​។ ​កីឡាករ​វ័យ ២០​ឆ្នាំ​រូប​នេះ​ស៊ុត​បញ្ចូល​ទី​ នៅ​ពេល​មិត្ត​រួម​ក្រុម​របស់​ខ្លួន Solly March ធ្វើ​អោយ​មាន​កំហុស​លើ Hojbjerg​ តែ​អាជ្ញា​កណ្ដាល Graham Scott ពិនិត្យមើល​ឡើងវិញ ​និង​អោយ​គ្រាប់​បាល់​នេះ​ទៅ Brighton  ខណៈ​ភាគី Spurs មិន​សប្បាយចិត្ត​។ ​

យ៉ាង​ណា​ក្តី Gareth Bale ត្រូវ​បាន​ផ្លាស់ប្ដូរ​ចូល​ និង​បានតែ​ត​បញ្ចូល​ទី​ពី​បាល់​កាត់​របស់ Sergio Reguilon​ ដែល​ជា​គ្រាប់​ដំបូង​របស់​គេ​តាំងពី​ឆ្នាំ២០១៣​។ ​ជ័យជំនះ​នេះ​ធ្វើ​ឲ្យ​ក្រុម​របស់​លោក Jose Mourinho​ ឡើង​មក​លេខ​២ ក្នុង​តារាង​តាម​ពី​ក្រោយ Liverpool ២ពិន្ទុ ខណៈ Everton ធ្លាក់​មក​លេខ​៣ ក្រោយ​ចាញ់ Southampton ៤–៣ ក្នុង​ផ្ទះ​ខ្លួនឯង​៕

អត្ថបទ​៖​នាង សុភា​វុ​ធ