នាយករដ្ឋមន្ត្រីប្រទេសស៊ែប៊ី លោក Milos Vucevic បានលាលែងពីតំណែងកាលពីថ្ងៃអង្គារ បន្ទាប់ពីមានការតវ៉ាប្រឆាំងអំពើពុករលួយជាច្រើនសប្តាហ៍ ដែលបានរាលដាលនៅពាសពេញប្រទេស។ បាតុកម្មទាំងនេះ បង្កឡើងដោយការបាក់រលំដំបូលនៅស្ថានីយរថភ្លើងក្នុងទីក្រុង Novi Sad បណ្តាលឲ្យមនសុ្ស ១៥ នាក់ស្លាប់។

អ្វីដែលបានចាប់ផ្តើម ខណៈការតវ៉ាទ្រង់ទ្រាយតូចៗនៅក្នុងតំបន់ បានផ្ទុះឡើង រហូតដល់មានប្រតិកម្មខ្លាំងក្លា ដោយមានមនុស្សរាប់ពាន់នាក់ចេញមកតវ៉ានៅក្នុងរដ្ឋធានី Belgrade ដើម្បីដាក់កំហុសមហន្តរាយនេះលើអំពើពុករលួយក្នុងជួររដ្ឋាភិបាល ដែលលោក Vucevic បាននិយាយនៅក្នុងសន្និសីទសារព័ត៌មានថា លោក និងអភិបាលក្រុង Novi Sad នឹងលាលែងពីតំណែង ដែលបំពេញតាមការទាមទាររបស់ក្រុមអ្នកតវ៉ាខ្លាំងបំផុតមួយចំនួន។

ទាំងរដ្ឋមន្ត្រីក្រសួងដឹកជញ្ជូន និងរដ្ឋមន្ត្រីពាណិជ្ជកម្ម បានលាលែងពីតំណែងរួចហើយ ប៉ុន្តែវាពុំបានធ្វើឲ្យការផ្ទុះកំហឹងរបស់សាធារណជន ស្ងប់ស្ងាត់ឡើយ។ លោក Vucevic បានស្តីបន្ទោសការជ្រៀតជ្រែកពីបរទេស សម្រាប់ការបញ្ឆេះការតវ៉ា។

ការផ្តោតការយកចិត្តទុកដាក់សម្រាប់អ្នកវិភាគជាច្រើននៅពេលនេះ គឺថាតើវានឹងប៉ះពាល់ដល់ប្រធានាធិបតី លោក Aleksandar Vucic ក្នុងកម្រិតណា។ គណបក្សរបស់លោកបានទទួលជ័យជម្នះក្នុងការបោះឆ្នោតមុនអាណត្តិយ៉ាងងាយស្រួលក្នុងឆ្នាំ២០២៣ ប៉ុន្តែដោយត្រូវបានចោទប្រកាន់ពីបទស៊ីសំណូកសូកប៉ាន់ និងការជាប់ទាក់ទងឧក្រិដ្ឋកម្ម បានស្ថិតនៅក្រោមសម្ពាធកាន់តែខ្លាំងឡើង។