ជារៀងរាល់ឆ្នាំ ក្រោយចប់ថ្ងៃសែនចូលឆ្នាំចិន ប្រជាពលរដ្ឋខ្មែរកាត់សែស្រឡាយចិន រាប់រយគ្រួសារ តែងនាំគ្នាទៅជាវអំពៅខ្មៅ នៅវិហារចិនដើម្បីយកទៅផ្ទះ ដោយពួកគេមានជំនឿថា អាជីវកម្មរបស់ពួកគេនឹងរីកចម្រើនដូចការលូតលាស់របស់អំពៅ និងធ្វើឱ្យការរស់នៅក្នុងក្រុមគ្រួសារមានសុភមង្គល។

ប្រជាពលរដ្ឋខ្មែរកាត់សែស្រឡាយចិន ជារៀងរាល់ឆ្នាំតែងនាំគ្នាទៅបន់ស្រន់ និងនាំយកអំពៅខ្មៅ ផ្លែក្រូច និងធូប ពីវិហារចិន ត្រឡប់មកគេហដ្ឋាន។ ជាក់ស្ដែងសម្រាប់វិហារលោកតាធំ ក្រុងតាខ្មៅ ជាទីតាំងប្រមូលផ្ដុំដ៏ធំមួយសម្រាប់ប្រជាពលរដ្ឋរស់នៅខេត្តកណ្ដាល និងពលរដ្ឋរស់នៅរាជធានីភ្នំពេញ ទៅយកអំពៅខ្មៅ។ ពលរដ្ឋខ្មែរកាត់សែស្រឡាយចិន សម្រុកទៅបន់ស្រន់ ទៅយកអំពៅខ្មៅ ផ្លែក្រូច ក៏ដូចជាធូបពីវិហារចិននេះ ចាប់ផ្ដើមតាំងពីកណ្ដាលអាធ្រាត្រនៃថ្ងៃសែនចូលឆ្នាំចិនមកម្លេះ ហើយក៏មានប្រជាពលរដ្ឋជាច្រើនគ្រួសារបន្តទៅយកអំពៅខ្មៅនៅព្រឹកថ្ងៃទី ១នៃថ្ងៃចូលឆ្នាំចិនផងដែរ។

សម្រាប់ការទៅយកអំពៅខ្មៅនេះ ប្រជាពលរដ្ឋអាចទិញ ធូប ទៀន ផ្លែក្រូច និងអំពៅខ្មៅ នៅពីមុខវិហារចិនដោយផ្ទាល់។ ពួកគេចូលទៅដុតធូប បន់ស្រន់ រួចយកអំពៅខ្មៅឱ្យម៉ុងសាយប្រសិទ្ធិ ទើបនាំត្រឡប់ទៅផ្ទះ។ ពួកគេមានជំនឿថា ការមកយកអំពៅខ្មៅនៅវិហារចិនជារៀងរាល់ឆ្នាំនេះ ជួយឱ្យគ្រួសារពួកគេមានសុខសុភមង្គល និងការរកស៊ីកាន់តែរីកចម្រើនលូតលាស់។

តម្រូវការអំពៅខ្មៅ រាប់ពាន់ដើមនាពេលនេះ ក៏ធ្វើឱ្យតម្លៃអំពៅខ្មៅ ដែលដាក់លក់នៅពីមុខវិហារចិន មានការហក់ឡើងថ្លៃផងដែរ។ អ្នកលក់អំពៅខ្មៅជាច្រើនបានមកប្រមូលផ្ដុំលក់អំពៅខ្មៅតាំងពីកណ្ដាលអាធ្រាត្រ ដោយពួកគេអាចលក់អំពៅខ្មៅ១គូ ក្នុងតម្លៃចាប់ពី ១៥ ០០០រៀល រហូតដល់ប្រមាណ ៤០ ០០០រៀល ទៅតាមទំហំ ប្រវែងដើមអំពៅ៕ អត្ថបទ៖ គឹម ហុក