អ្នកកាន់សាសនាហិណ្ឌូរាប់លាននាក់ បន្តនាំគ្នាទៅមាត់ទន្លេដ៏ពិសិដ្ឋដើម្បីជ្រមុជទឹកស័ក្ដិសិទ្ធនៅក្នុងទីក្រុង ប្រាយ៉ាករាជ (Prayagraj) ភាគខាងជើងនៃប្រទេសឥណ្ឌា នៅថ្ងៃពុធ (២៩ មករា) នេះ ទោះបីជាបន្ទាប់ពីមានហេតុការណ៍រត់ជាន់គ្នាយ៉ាងគ្រោះថ្នាក់ ដែលបានសម្លាប់មនុស្សជាច្រើននាក់ក៏ដោយ។

សន្តិសុខបានបង្កើនប្រតិបត្តិការត្រួតពិនិត្យហ្វូងមនុស្សនៅពិធីបុណ្យ មហា កុម្ភ មេឡា (Maha Kumbh mela) ឬហៅថា ពិធីបុណ្យឆ្នាំងទឹកអម្រិត (Great Pitcher Festival) ដ៏ធំ។ អាជ្ញាធរជាច្រើនបានឈរនៅពីក្រោយរនាំងសន្តិសុខដើម្បីគ្រប់គ្រងហ្វូងមនុស្សដ៏ច្រើនកុះករ ខណៈពួកគេបានមកដល់ទាំងព្រឹកព្រលឹមសម្រាប់ការជ្រមុជទឹកដ៏ពិសិដ្ឋដើម្បីប្រារព្ធថ្ងៃដ៏អស្ចារ្យបំផុតនៃពិធីបុណ្យ មហា កុម្ភ មេឡា។

អាជ្ញាធរបានរំពឹងថាមនុស្សចំនួន ១០០លាននាក់ នឹងប្រមូលផ្តុំគ្នានៅទីប្រជុំជនបណ្តោះអាសន្នក្នុងក្រុង Prayagraj នៅថ្ងៃពុធនេះ សម្រាប់ការជ្រមុជទឹកអម្រិតដ៏ស័ក្ដិសិទ្ធ ដែលត្រូវបានចាត់ទុកថាជាថ្ងៃដ៏វិសេសវិសាលបំផុត ដោយសារតែការជួបគ្នាដ៏កម្រនៃអង្គទេវៈ បន្ទាប់ពីរយៈពេល ១៤៤ឆ្នាំ៕