ប្រតិបត្តិការជួយសង្គ្រោះបានបន្តរហូតដល់ព្រឹកថ្ងៃពុធនេះ បន្ទាប់ពីរថយន្តដឹកទំនិញមួយគ្រឿង បានធ្លាក់ចូលទៅក្នុងក្រហូងនៃផ្លូវប្រសព្វដ៏មមាញឹកមួយកន្លែង នៅជិតទីក្រុងតូក្យូ ប្រទេសជប៉ុន ដែលបានបាក់ស្រុត កាលពីថ្ងៃមុន។ ផ្លូវ បានបាក់ស្រុតក្នុងទីក្រុង Yashio ខេត្ត Saitama នៅម៉ោងប្រហែល៩ និង៤០ នាទីព្រឹក កាលពីថ្ងៃអង្គារ ម៉ោងក្នុងស្រុក ហើយរថយន្តបានធ្លាក់ចូលទៅក្នុងក្រហូងដែលមានទទឹងប្រហែល១០ម៉ែត្រ និងជម្រៅ៥ម៉ែត្រ។

នគរបាលនិយាយថា ផ្លូវនេះ ត្រូវបានគេជឿថាបានបាក់ស្រុតភ្លាមៗ មុនពេលរថយន្តនោះធ្លាក់ចូល ដោយផ្អែកលើការនិយាយលើកឡើងរបស់សាក្សី។

នៅម៉ោងប្រហែល១រំលងអាធ្រាតថ្ងៃពុធនេះ រយៈពេលជាង១៥ម៉ោងបន្ទាប់ពីឧបទ្ទវហេតុ ក្រុមអ្នកជួយសង្គ្រោះបានរៀបចំទាញយកបំណែកដែលផ្ទុកនៅលើរថយន្តចេញពីផ្លូវស្រុត ដោយប្រើប្រាស់ដងស្ទូចធំ។ ប៉ុន្តែនគរបាលនិយាយថា រថយន្តនៅតែស្ថិតក្នុងក្រហូងផ្លូវស្រុតនោះ។

មន្ត្រីពន្លត់អគ្គិភ័យ បាននិយាយថា អ្នកបើកបររថយន្ត ជាមនុស្សតែម្នាក់គត់នៅក្នុងរថយន្តនោះ ដែលអាចនិយាយទៅកាន់ក្រុមអ្នកជួយសង្គ្រោះ រហូតដល់ម៉ោងប្រហែល១រសៀល ថ្ងៃអង្គារ។ ប៉ុន្តែតាមសេចក្តីរាយការណ៍ថា លែងមានការឆ្លើយតបទៀតហើយ។

ទីតាំងគ្រោះថ្នាក់នេះ ស្ថិតនៅផ្លូវប្រសព្វដ៏មមាញឹកមួយនៅជិតការិយាល័យទីក្រុង Yashio។ នគរបាល កំពុងជំរុញអ្នកស្រុកដែលស្ថិតនៅក្នុងរង្វង់២០០ម៉ែត្រ ឱ្យជម្លៀសទៅកាន់សាលាក្រុងដោយព្រមានថាបំពង់ឧស្ម័នក្រោមដី អាចរងការខូចខាត។