អ៊ុយក្រែន បាននិយាយកាលពីថ្ងៃអង្គារថា កងកម្លាំងរបស់ខ្លួន បានវាយប្រហារលើ «ប៉ុស្តិ៍បញ្ជាការ» យោធារុស្ស៊ី នៅក្នុងតំបន់ឃើស ( Kursk) របស់រុស្ស៊ី ក្នុងអំឡុងពេល «ប្រតិបត្តិការប្រយុទ្ធ» ខណៈដែលកំពុងតាមដានលើការអះអាងថា ខ្លួនបានបើកការវាយលុកថ្មី នៅក្នុងតំបន់ព្រំដែន។

កងទ័ពរបស់រុស្ស៊ី បាននិយាយកាលពីចុងសប្តាហ៍មុនថា ទីក្រុងគីវ កំពុងបង្កើន «ការវាយប្រហារបក» ទៅលើទាហានរុស្សឲ៊ី នៅក្នុងតំបន់ ដែលកងកម្លាំងរបស់អ៊ុយក្រែន បានកាន់កាប់លើទឹកដីជាច្រើន ចាប់តាំងពីការលុកលុយដ៏គួរឲ្យភ្ញាក់ផ្អើល កាលពីខែសីហា ឆ្នាំ ២០២៤។

នៅក្នុងសេចក្តីថ្លែងការណ៍ជាភាសាអង់គ្លេស កងទ័ពរបស់ទីក្រុងគីវ បានអះអាងថា ខ្លួនបានបើកការវាយប្រហារដោយមាន«ភាពជាក់លាក់កម្រិតខ្ពស់» នៅជិតភូមិ Belaya ភាគអាគ្នេយ៍នៃទឹកដីដែលគ្រប់គ្រងដោយទីក្រុងគីវ ដោយមិនបាននិយាយថា ខ្លួនបានប្រើប្រាស់អាវុធរយៈចម្ងាយឆ្ងាយរបស់លោកខាងលិចឬអត់ទេ។

ច្បាប់ដើមនៃសេចក្តីថ្លែងការណ៍ដែលត្រូវបានចេញផ្សាយដោយអគ្គសេនាធិការអ៊ុយក្រែន នៅលើគណនី Telegram របស់ខ្លួន បានលើកឡើងថា អ៊ុយក្រែន បានចាប់ផ្តើម «ប្រតិបត្តិការវាយលុកថ្មី» នៅក្នុងតំបន់ ឃើស។

បន្ទាប់មកការបង្ហោះ ត្រូវបានកែសម្រួល ហើយការនិយាយសំដៅទៅនឹង«ការវាយលុកថ្មី» ត្រូវបានដកចេញវិញ។

សេចក្តីថ្លែងការណ៍ ដែលបានធ្វើបច្ចុប្បន្នភាព បានឲ្យដឹងថា៖«ការវាយប្រហារនេះ គឺជាផ្នែកសំខាន់មួយនៃប្រតិបត្តិការប្រយុទ្ធរបស់អង្គភាពនៃកងកម្លាំងការពារអ៊ុយក្រែនដែលធ្វើប្រតិបត្តិការប្រយុទ្ធ» នៅក្នុងតំបន់ឃើស។