នាយករដ្ឋមន្ត្រីចាំផ្ទះលីបង់ លោក ណាជីប មីកាទី ( Najib Mikati) បាននិយាយកាលពីថ្ងៃអង្គារថា អ៊ីស្រាអែល បានដោះលែងអ្នកទោសលីបង់ ៩នាក់ ក្រោមលក្ខខណ្ឌនៃបទឈប់បាញ់ជាង ៦ សប្តាហ៍ ហើយបានជំរុញឲ្យមានការដោះលែង ៩ នាក់ទៀត។

កងកម្លាំងអ៊ីស្រាអែល គ្រោងនឹងដកខ្លួនចេញពីភាគខាងត្បូងលីបង់ នៅត្រឹមថ្ងៃអាទិត្យ ក្រោមលក្ខខណ្ឌនៃកិច្ចព្រមព្រៀងឈប់បាញ់ ជាមួយក្រុមសកម្មប្រយុទ្ធលីបង់ហេសបូឡា ប៉ុន្តែកាលកំណត់នោះ ត្រូវបានបន្តរហូតដល់ថ្ងៃទី ១៨ ខែកុម្ភៈ។

នៅក្នុងសេចក្តីថ្លែងការណ៍មួយ ដែលបានចេញផ្សាយកាលពីថ្ងៃអង្គារ លោក មីកាទី បានថ្លែងអំណរគុណដល់គណៈកម្មាធិការអន្តរជាតិនៃកាកបាទក្រហម(ICRC)សម្រាប់តួនាទីរបស់ខ្លួន ក្នុងការដោះលែងអ្នកទោសសង្គ្រាមចំនួន ៩នាក់ ដែលត្រូវបានដោះលែងដោយអ៊ីស្រាអែល រហូតមកដល់ពេលនេះ។

លោកក៏បានស្នើឲ្យ ICRC ធ្វើការសម្រាប់ការដោះលែង «ជនជាតិលីបង់ ៩នាក់ផ្សេងទៀត ដែលនៅជាប់ ឃុំ នៅក្នុងប្រទេសអ៊ីស្រាអែល»។

លោក មីកាទី បានអំពាវនាវរួចហើយទៅកាន់សហរដ្ឋអាមេរិកកាលពីថ្ងៃអាទិត្យ ដើម្បីប្រើប្រាស់ឥទ្ធិពលរបស់ខ្លួន ជាមួយសម្ព័ន្ធមិត្តរបស់ខ្លួន ដើម្បីទទួលបានការដោះលែងជនជាតិលីបង់ ដែលត្រូវបានឃុំខ្លួនដោយអ៊ីស្រាអែល ក្នុងអំឡុងពេលសង្រ្គាម។

នៅក្នុងសេចក្តីថ្លែងការណ៍មួយកាលពីថ្ងៃអង្គារ គណៈកម្មាធិការអន្តរជាតិនៃកាកបាទក្រហម(ICRC) បានស្វាគមន៍ចំពោះការដោះលែងអ្នកទោសលីបង់ក្រុមដំបូង។