រដ្ឋមន្ត្រីការបរទេសអាមេរិក លោក Marco Rubio កាលពីថ្ងៃអង្គារ (ទី២៨ ខែមករា) បានប្រាប់ប្រធានាធិបតីរ៉្វាន់ដា លោក Paul Kagame ថា ទីក្រុងវ៉ាស៊ីនតោន «មានក្ដីបារម្ភយ៉ាងខ្លាំងក្លា» ចំពោះការកើនឡើងនូវភាពតានតឹងក្នុងជម្លោះ នៅសាធារណរដ្ឋប្រជាធិបតេយ្យកុងហ្គោ (DRC) ជាពិសេសការដួលរលំទីក្រុង Goma ដោយសារក្រុមឧទ្ទាមដែលទទួលបានការគាំទ្រពីប្រទេសរ៉្វាន់ដា។

ការអំពាវនាវ បានកើតមានឡើង ក្នុងពេលដែលសហរដ្ឋអាមេរិក កាលពីថ្ងៃអង្គារ បានជំរុញឲ្យក្រុមប្រឹក្សាសន្តិសុខអង្គការសហប្រជាជាតិពិចារណាចាត់វិធានការ ដើម្បីបញ្ឈប់ការវាយលុកដោយកងទ័ពរ៉្វាន់ដា និងកងកម្លាំងរបស់ក្រុមឧទ្ទាម M23 នៅភាគខាងកើតកុងហ្គោ ខណៈដែលជម្លោះនៅទីនោះ កាន់តែមានសភាពតានតឹងខ្លាំងឡើងៗ។

ក្រុមឧទ្ទាម M23 ដែលគាំទ្រដោយរ្វ៉ាន់ដា បានចូលដល់ទីក្រុង Goma ដែលជាទីក្រុងធំបំផុតនៅភាគខាងកើតកុងហ្គោ កាលពីថ្ងៃចន្ទ (ទី២៧ ខែមករា) ជាការកើនឡើងនូវភាពតានតឹងដ៏អាក្រក់បំផុត ក្នុងជម្លោះដ៏រ៉ាំរ៉ៃរយៈពេលជាង ១ទសវត្សរ៍។

ក្រសួងការបរទេស បានឲ្យដឹងនៅក្នុងសេចក្តីថ្លែងការណ៍ថា៖ «លោករដ្ឋមន្ត្រីបានជំរុញឲ្យមានបទឈប់បាញ់ជាបន្ទាន់ នៅក្នុងតំបន់ និងជំរុញឲ្យគ្រប់ភាគីទាំងអស់គោរពបូរណភាពទឹកដី»។ ក្រសួងការបរទេសបានបន្ថែមថា៖ «រដ្ខមន្ត្រីលោក Rubio បានសង្កត់ធ្ងន់ថា សហរដ្ឋអាមេរិកមានក្ដីបារម្ភយ៉ាងខ្លាំងក្លា ចំពោះការកើនឡើងនូវភាពតានតឹង ក្នុងជម្លោះដែលកំពុងបន្តមាននៅភាគខាងកើត DRC ជាពិសេសការដួលរលំទីក្រុង Goma ដោយសារក្រុមប្រដាប់អាវុធ M23 ដែលគាំទ្រដោយរ្វ៉ាន់ដា»។

កុងហ្គោបានចោទប្រកាន់រ៉្វាន់ដាថា បានបញ្ជូនកងទ័ពរបស់ខ្លួនឆ្លងកាត់ព្រំដែន ខណៈដែលរ៉្វាន់ដា បានលើកឡើងថា ការប្រយុទ្ធ នៅជិតព្រំដែន បានគំរាមកំហែងដល់សន្តិសុខរបស់ខ្លួន តែមិនបានធ្វើអត្ថាធិប្បាយដោយផ្ទាល់ថា តើកងទ័ពរបស់ខ្លួន ស្ថិតនៅក្នុងប្រទេសកុងហ្គោដែរ ឬយ៉ាងណា៕