ការិយាល័យរបស់លោក Robert Fico កាលពីថ្ងៃអង្គារ (ទី២៨ ខែមករា) បានឲ្យដឹងថា លោកនាយករដ្ឋមន្ត្រីស្លូវ៉ាគី ដែលបានប្រឹងប្រែងធ្វើយ៉ាងណាឲ្យដំណើរការឡើងវិញនូវការបញ្ជូនឧស្ម័នរបស់រុស្ស៊ីឆ្លងកាត់អ៊ុយក្រែន នឹងពិភាក្សាអំពីបញ្ហានេះ ជាមួយមន្ត្រីគណៈកម្មការអឺរ៉ុប នៅថ្ងៃព្រហស្បតិ៍ (ទី៣០ ខែមករា)។

វិមានក្រឹមឡាំង បានប្រាប់ថា ខ្លួនបានគាំទ្រដល់ការចាប់ផ្ដើមឡើងវិញនូវការបញ្ជូនឧស្ម័នឆ្លងកាត់នេះ តែអ៊ុយក្រែនបានបដិសេធមិនបន្តកិច្ចព្រមព្រៀង ដោយផ្ដល់ហេតុផលថា លំហូរនេះជួយផ្តល់មូលនិធិដល់សង្គ្រាមរបស់រុស្ស៊ី ប្រឆាំងនឹងទីក្រុងគីវ។ ការបញ្ជូនឧស្ម័នឆ្លងកាត់អ៊ុយក្រែន គឺជាផ្លូវដែលត្រូវបានសាងសង់ឡើង ដើម្បីបញ្ជូនការផ្គត់ផ្គង់ទៅកាន់ប្រទេសស្លូវ៉ាគី អូទ្រីស និងអតីតប្រទេសសហភាពសូវៀត គឺម៉ុលដាវី។

ប្រធានាធិបតីអ៊ុយក្រែន លោក Volodymyr Zelenskiy បានបន្ទោសលោក Fico ថា ព្យាយាមទទួលបានការផ្គត់ផ្គង់ថ្មីពីទីក្រុងមូស្គូជំនួសឲ្យការផ្ទត់ផ្គង់ពីប្រទេសលោកខាងលិច។ លោក Fico បានជួបជាមួយប្រធានាធិបតីរុស្ស៊ី លោក Vladimir Putin នៅវិមានក្រឹមឡាំង កាលពីខែមុន ដើម្បីពិភាក្សាអំពីលំហូរឧស្ម័នទៅកាន់ប្រទេសរបស់លោក។

ស្លូវ៉ាគីបានស្វាគមន៍សេចក្តីថ្លែងការណ៍របស់គណៈកម្មការអឺរ៉ុប ស្តីពីការបន្តកិច្ចពិភាក្សាជាមួយអ៊ុយក្រែន ជុំវិញលទ្ធភាពបញ្ចូនឧស្ម័នឆ្លងកាត់ថ្មី ដោយបន្ថែមថា ឥឡូវនេះខ្លួនបានឃើញជម្រើសនៃការជញ្ជូនឧស្ម័នពីប្រទេសអាសែប៊ៃហ្សង់ ខណៈវិលទៅកាន់កិច្ចពិភាក្សាវិញ។ ទាំងស្លូវ៉ាគី និងហុងគ្រី បាន និងកំពុងដាក់សម្ពាធសហភាពអឺរ៉ុប (EU) ឲ្យចាត់វិធានការ ដើម្បីធ្វើឲ្យមានលំហូរឧស្ម័នឡើងវិញទៅកាន់ប្រទេសទាំង២ តាមរយៈបំពង់បង្ហូរដ៏សំខាន់មួយ៕