យោធាសហរដ្ឋអាមេរិក កាលពីថ្ងៃអង្គារ (ទី២៨ ខែមករា) បានឲ្យដឹងថា ខ្លួននឹងអនុញ្ញាតឲ្យកងកម្លាំងអន្តោប្រវេសន៍ និងគយ (ICE) ឃុំខ្លួនជនអន្តោប្រវេនស៍ នៅឯមូលដ្ឋានទ័ព Buckley Space Force Base ក្នុងរដ្ឋ Colorado ដោយពង្រីកបន្ថែមនូវតួនាទីរបស់មន្ទីរបញ្ចកោណ ក្នុងវិធានការបង្ក្រាបអន្តោប្រវេសន៍របស់ប្រធានាធិបតី លោក Donald Trump។

ការសម្រេចនេះ កើតមានឡើងបន្ថែមពីលើយន្តហោះយោធាអាមេរិកដែលដឹកជនអន្តោប្រវេសន៍និរទេសចេញពីប្រទេស និងការដាក់ពង្រាយទាហានជាង ១.៦០០នាក់ទៅកាន់ព្រំដែនសហរដ្ឋអាមេរិកជាមួយម៉ិកស៊ិក បន្ទាប់ពីមានការប្រកាសអាសន្នរបស់លោក Trump ស្តីអំពីអន្តោប្រវេសន៍ កាលពីសប្តាហ៍មុន។

ទីបញ្ជាការភាគខាងជើងរបស់យោធាអាមេរិក បានឲ្យដឹងនៅក្នុងសេចក្តីថ្លែងការណ៍ថា ខ្លួនបានចាប់ផ្តើមផ្តល់ទីតាំង នៅឯមូលដ្ឋាន Buckley ដល់កងកម្លាំងអន្តោប្រវេសន៍ និងគយ (ICE) កាលពីថ្ងៃទី២៨ ខែមករា «ដើម្បីអនុញ្ញាតឲ្យទីភ្នាក់ងារអនុវត្តច្បាប់អន្តោប្រវេសន៍ និងគយរបស់សហរដ្ឋអាមេរិក ដំណើរការ និងដោះស្រាយជាមួយឧក្រិដ្ឋជនជនបរទេស នៅក្នុងសហរដ្ឋអាមេរិក»។

បញ្ជាការភាគខាងជើង បានបន្ថែមថា៖ «តម្រូវការរបស់កងកម្លាំងអន្តោប្រវេសន៍ និងគយ (ICE) សម្រាប់ទីតាំងនោះ រួមមានមជ្ឈមណ្ឌលប្រតិបត្តិការបណ្តោះអាសន្ន តំបន់រៀបចំ និងទីតាំងឃុំខ្លួនបណ្តោះអាសន្ន ដើម្បីទទួល ឃុំខ្លួន និងដំណើរការ ចំពោះជនបរទេសខុសច្បាប់»។

យ៉ាងណាក្ដី ទីបញ្ជាការភាគខាងជើង មិនបានបញ្ជាក់ថា តើចំនួនជនអន្តោប្រវេនស៍ប៉ុន្មាននាក់ អាចនឹងត្រូវឃុំខ្លួន នៅមូលដ្ឋាន Buckley នេះ ឬថា តើអាចនឹងមានមូលដ្ឋានទ័ពអាមេរិកបន្ថែមទៀតបើកដំណើរការ សម្រាប់ការឃុំខ្លួនជនអន្តោប្រវេសន៍ ក្នុងពេលឆាប់ៗនេះដែរ ឬទេ។ ទីភ្នាក់ងារអន្តោប្រវេសន៍ និងគយ (ICE) មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ៕