ទិន្នន័យរបស់ក្រសួងសុខាភិបាល នៅថ្ងៃពុធ (ទី២៩ ខែមករា) នេះ បានបង្ហាញថា ប្រទេសជប៉ុន បានឃើញមានចំនួនខ្ពស់បំផុតនៃការធ្វើអត្តឃាត ក្នុងចំណោមសិស្សានុសិស្ស ក្នុងឆ្នាំ២០២៤។

ក្រសួងបានឲ្យដឹងថា ទិន្នន័យចុងក្រោយបំផុត ក្នុងចំណោមសិស្សនៅបឋមសិក្សា រហូតដល់វិទ្យាល័យ បានកើនឡើងដល់ចំនួន ៥២៧ករណី ដោយឡើងពី ៥១៣ករណី ក្នុងឆ្នាំ២០២៣។ ចំនួនសរុបនៃមនុស្សគ្រប់វ័យដែលស្លាប់ដោយការធ្វើអត្តឃាត បានធ្លាក់ចុះ ៧,២ភាគរយ ពោលគឺមកត្រឹម ២០.២៦៨នាក់ ដែលទាបជាងយ៉ាងច្រើនពីកម្រិតខ្ពស់បំផុតនៃចំនួន ៣៤.៤២៧ករណី ក្នុងឆ្នាំ២០០៣។

ទិន្នន័យចុងក្រោយ បានបង្ហាញថា ចំនួនក្នុងចំណោមមនុស្សដែលមានអាយុក្រោម ២០ឆ្នាំ ដែលរួមមានទាំងអ្នកនៅសាលារៀនផងដែរ បានធ្លាក់ចុះដល់ចំនួន ៨០០នាក់ ក្នុងឆ្នាំ២០២៤ ដោយធ្លាក់ពី ៨១០នាក់ ក្នុងឆ្នាំ២០២៣។

នាយករងខុទ្ទកាល័យគណៈរដ្ឋមន្ត្រី លោក Keiichiro Tachibana បានប្រាប់អ្នកសារព័ត៌មានថា៖ «យើងគិតគូរដល់រឿងនេះខ្លាំងណាស់»។ លោកបានបន្ថែមថា៖ «យើងនឹងបន្តប្រឹងប្រែងឲ្យអស់ពីលទ្ធភាព ដើម្បីចាត់វិធានការការពារអាយុជីវិតកុមារ និងដើម្បីបង្កើតបានសង្គមមួយដែលគ្មាននរណាម្នាក់ត្រូវរងសម្ពាធ រហូតដល់ផ្ដាច់ជីវិតខ្លួនឯង»។

គួរបញ្ជាក់ថា ប្រទេសជប៉ុនជារៀងរាល់ឆ្នាំ ឃើញមានចំនួននៃការធ្វើអត្តឃាតរបស់ក្មេងជំទង់កើនឡើង នៅចុងបញ្ចប់នៃរាល់ការសម្រាករដូវក្តៅ នាចុងខែសីហា ដល់ដើមខែកញ្ញា ដែលជំរុញឲ្យរដ្ឋាភិបាល និងប្រព័ន្ធផ្សព្វផ្សាយបង្កើនការអំពាវនាវជាសាធារណៈ សម្រាប់ក្មេងជំទង់ដែលជួបការលំបាក ក្នុងការស្វែងរកជំនួយ។ 

មូលហេតុពិតប្រាកដនៃការធ្វើអត្តឃាតរបស់សិស្សានុសិស្សភាគច្រើន មិនទាន់ដឹងនៅឡើយទេ។ ការវិភាគកន្លងមក បានបង្ហាញពីក្មេងជំទង់ដែលប្រឈមមុខនឹងសម្ពាធជាច្រើន ក្នុងនោះរួមមានទាំងការទាក់ទងនឹងការសិក្សា ការគំរាមកំហែង ទំនាក់ទំនង ការជ្រើសរើសអាជីព និងបញ្ហាសុខភាព៕