ប៉ុន្មានថ្ងៃបន្ទាប់ពីក្រុមហ៊ុន DeepSeek របស់ប្រទេសចិន បានបង្ហាញពីរបកគំហើញនៅក្នុងកុំព្យូទ័របញ្ញាសិប្បនិម្មិត AI មានតម្លៃថោក ដែលអង្រួនឧស្សាហកម្មបច្ចេកវិទ្យារបស់សហរដ្ឋអាមេរិក នាយកប្រតិបត្តិរបស់ក្រុមហ៊ុន Microsoft និង Meta បានចេញមុខការពារការចំណាយដ៏ច្រើន ដែលពួកគេបាននិយាយថាជាគន្លឹះក្នុងការទប់ការប្រកួតប្រជែងក្នុងវិស័យថ្មីនេះ។

វឌ្ឍនភាពរហ័សរបស់បណ្ដាញសង្គម DeepSeek បានធ្វើឱ្យមានការសង្ស័យអំពីការនាំមុខដែលអាមេរិកមាននៅក្នុង AI ជាមួយនឹងគំរូនានា ដែលខ្លួនអះអាងថាអាចផ្គូផ្គង ឬសូម្បីតែដំណើរការប្រសើរជាងគូប្រជែងលោកខាងលិចក្នុងការចំណាយ ប៉ុន្តែនាយកប្រតិបត្តិសហរដ្ឋអាមេរិកបាននិយាយកាលពីថ្ងៃពុធថា ការបង្កើតបណ្ដាញកុំព្យូទ័រដ៏ធំគឺជារឿងចាំបាច់ដើម្បីបម្រើក្រុមហ៊ុន ដែលកំពុងរីកចម្រើន។

នាយកប្រតិបត្តិក្រុមហ៊ុន Meta លោក Mark Zuckerberg បាននិយាយតាមទូរស័ព្ទថា ការវិនិយោគ យ៉ាងច្រើននៅក្នុងការចំណាយមូលធន និងហេដ្ឋារចនាសម្ព័ន្ធ នឹងក្លាយជាអត្ថប្រយោជន៍ជាយុទ្ធសាស្រ្តក្នុងរយៈពេលយូរ។

លោក សាទីយ៉ា ណាដេឡា (Satya Nadella) នាយកប្រតិបត្តិក្រុមហ៊ុន Microsoft បាននិយាយថាការចំណាយ គឺចាំបាច់ដើម្បីជម្នះឧបសគ្គសមត្ថភាពដែលបានរារាំងសមត្ថភាពរបស់ក្រុមហ៊ុនបច្ចេកវិទ្យាខ្នាតយក្សមួយនេះ ក្នុងការទាញយកអត្ថប្រយោជន៍លើបញ្ញាសិប្បនិម្មិត AI ។

លោកបាននិយាយតាមទូរស័ព្ទជាមួយក្រុមអ្នកវិភាគថា នៅពេល AI កាន់តែមានប្រសិទ្ធភាព និងអាចចូលដំណើរការបាន យើងនឹងឃើញតម្រូវការកាន់តែច្រើនឡើង។

ក្រុមហ៊ុន Microsoft បានវិនិយោគថវិកាចំនួន ៨០ពាន់លានដុល្លារសម្រាប់ AI ក្នុងឆ្នាំសារពើពន្ធបច្ចុប្បន្នរបស់ខ្លួន ខណៈក្រុមហ៊ុនបណ្ដាញសង្គម Meta វិញ បានសន្យាវិនិយោគប្រាក់ចំនួន ៦៥ពាន់លានដុល្លារសម្រាប់បច្ចេកវិទ្យានេះ៕