ទីប្រឹក្សាជាន់ខ្ពស់សេតវិមាននៅសប្តាហ៍នេះបានព្រមានថា បណ្ដាញ DeepSeek របស់ចិន អាចទទួលបានអត្ថប្រយោជន៍ពីវិធីសាស្រ្តមួយដែលត្រូវចោទប្រកាន់ថាកេងចំណេញពីភាពជឿនលឿននៃគូប្រជែងរបស់សហរដ្ឋអាមេរិក ដែលហៅថា "ការចម្រាញ់យកភាពល្អឥតខ្ចោះនៃបច្ចេកវិទ្យា"។

ប្រភពប្រតិបត្តិ អ្នកជំនាញ និងវិនិយោគិននៅ Silicon Valley របស់អាមេរិកនិយាយថា នោះជាបច្ចេកទេសដែលពាក់ព័ន្ធនឹងប្រព័ន្ធ AI មួយរៀនពីប្រព័ន្ធ AI មួយផ្សេងទៀត ហើយវាយអាចពិបាកខ្លាំងណាស់ក្នុងការបញ្ឈប់។

DeepSeek ក្នុងខែនេះបានធ្វើឱ្យកក្រើកវិស័យបច្ចេកវិទ្យាជាមួយនឹងគំរូ AI ថ្មីដែលហាក់ដូចជាប្រកួតប្រជែងនឹងសមត្ថភាពរបស់ក្រុមហ៊ុនខ្នាតយក្សអាមេរិក ដូចជា OpenAI ប៉ុន្តែមានតម្លៃទាបជាងច្រើន ហើយក្រុមហ៊ុនដែលមានមូលដ្ឋាននៅចិនមួយនេះ បានផ្តល់កូដដោយមិនគិតថ្លៃទៀតផង។

អ្នកជំនាញបច្ចេកវិទ្យាមួយចំនួនជឿថា គំរូរបស់ DeepSeek ប្រហែលជាបានរៀនពីម៉ូដែលអាមេរិក ដើម្បីទទួលផលចំណេញខ្លះៗ។ បច្ចេកទេសចម្រាញ់ភាពល្អឥតខ្ចោះនោះ ពាក់ព័ន្ធនឹងការមានគំរូ AI ចាស់ៗដែលបង្កើតឡើងរួច និងមានថាមពលខ្លាំង ទៅវាយតម្លៃគុណភាពនៃចម្លើយដែលចេញមកពីគំរូ AI ថ្មី រួចផ្ទេរការរៀនសូត្ររបស់ម៉ូដែល AI ចាស់ប្រកបដោយប្រសិទ្ធភាព។

នោះមានន័យថា ម៉ូដែលថ្មីអាចទទួលបានអត្ថប្រយោជន៍នៃការវិនិយោគដ៏ធំទាំងពេលវេលា និងថាមពលកុំព្យូទ័រដែលបានដាក់ចូលទៅក្នុងការកសាងគំរូដំបូង ដោយមិនមានការចំណាយពាក់ព័ន្ធច្រើន ទើបធ្វើឱ្យ AI ថ្មីនេះមានតម្លៃទាប ហើយពិបាកក្នុងការរារាំង៕