អ្នកជាប់កិច្ចសន្យាយោធាបរទេសរាប់សិបនាក់ បានរាយការណ៍ទៅអង្គការសហប្រជាជាតិ ហើយបានឆ្លងចូលទៅក្នុងប្រទេសរ៉្វាន់ដា ពីទីក្រុង Goma ប្រទេសកុងហ្គោកាលពីថ្ងៃពុធ ទី២៩ ខែមករា ខណៈក្រុមឧទ្ទាម M23 បានរឹតបន្តឹងការក្តោបក្តាប់របស់ពួកគេលើទីក្រុងធំបំផុតនៅប្រទេសកុងហ្គោភាគខាងកើត។

ក្នុងអំឡុងពេលប្រតិបត្តិការ សារព័ត៌មានរ៉យទ័របានឃើញទាហានស៊ីឈ្នួលបរទេសម្នាក់ដេកនៅលើដី លើកដៃដាក់លើក្បាល ខណៈអ្នកប្រយុទ្ធ M23 បានស្រែកដាក់លោកថា កុំឱ្យត្រឡប់មកវិញ។

ក្រុមឧទ្ទាមM23 បានដណ្ដើមកាន់កាប់ទីក្រុង Goma កាលពីថ្ងៃច័ន្ទ បន្ទាប់ពីការប្រយុទ្ធគ្នាយ៉ាងខ្លាំងក្លា ដែលបង្ហាញពីការដណ្តើមបានទឹកដីដ៏សំខាន់បំផុត ចាប់តាំងពីឆ្នាំ២០២១។ ក្រុមនេះបានអះអាងថា នឹងប្រយុទ្ធដើម្បីសិទ្ធិពលរដ្ឋកុងហ្គោ Tutsi ។

ប្រទេសកុងហ្គោ និងអង្គការសហប្រជាជាតិ បានចោទប្រកាន់ប្រទេសរ៉្វាន់ដា ពីការគាំទ្រផ្នែកយោធា របស់ក្រុមM23 ប៉ុន្តែការចោទប្រកាន់ត្រូវបានទីក្រុង Kigali ប្រទេសរ៉្វាន់ដា បដិសេធ។

កាលពីថ្ងៃអង្គារ ក្រុមឧទ្ទាមបានដណ្តើមយកអាកាសយានដ្ឋានអន្តរជាតិទីក្រុង Goma ដោយបង្កើនការព្រួយបារម្ភនៃការកាន់កាប់យូរអង្វែង។

ការដួលរលំនៃទីក្រុងនេះ បានកាត់ផ្តាច់ផ្លូវផ្គត់ផ្គង់ដ៏សំខាន់ ដោយគំរាមកំហែងជំនួយទៅដល់មនុស្សរាប់សែននាក់ដែលភៀសខ្លួនចេញពីលំនៅឋាន នៅភាគខាងកើតប្រទេសកុងហ្គោ។