បណ្ដាអ្នកវិភាគ បានលើកឡើងថា ការជំរុញជាសាធារណៈចុងក្រោយបង្អស់របស់មេដឹកនាំកូរ៉េខាងជើងលោក គីម ជុងអ៊ុន (Kim Jong-un) ក្នុងការពង្រីកឃ្លាំងអាវុធនុយក្លេអ៊ែររបស់ប្រទេស គឺជាផ្នែកមួយនៃចំណាត់ការជាយុទ្ធសាស្ត្រ ដើម្បីដាក់សម្ពាធលើទីក្រុងវ៉ាស៊ីនតោនឲ្យទទួលយកកិច្ចពិភាក្សាត្រឹមកាត់បន្ថយអាវុធ ជាជាងការលុបបំបាត់អាវុធនុយក្លេអ៊ែរទាំងស្រុង។

កាលពីថ្ងៃពុធ (ទី២៩ ខែមករា) ក្នុងអំឡុងពេលធ្វើទស្សនកិច្ចទៅកាន់កន្លែងអ្វី ដែលប្រព័ន្ធផ្សព្វផ្សាយរដ្ឋបានពិពណ៌នាថា ជាមូលដ្ឋានផលិតសារធាតុបរមាណូ និងជាវិទ្យាស្ថានអាវុធនុយក្លេអ៊ែរនោះ លោក គីម បានអំពាវនាវឲ្យធ្វើ «លើសពីផែនការ ដើម្បីផលិតសារធាតុនុយក្លេអ៊ែរកម្រិតអាវុធ និងការពង្រឹងខែលការពារនុយក្លេអ៊ែររបស់ប្រទេស»។

លោកបានអះអាងថា «ការប្រឈមមុខដាក់គ្នារយៈពេលយូរ ជាមួយបណ្តាប្រទេសទុច្ចរិត និងអមិត្របំផុត គឺជារឿងជៀសមិនរួចនោះទេ» ដោយលោកអំពាវនាវឲ្យមានឃ្លាំងស្តុកអាវុធដ៏ចាំបាច់រឹងមាំ ដើម្បីត្រៀមទប់ទល់នឹងសត្រូវរបស់ខ្លួន ហើយបានពណ៌នាអំពីកម្លាំងនុយក្លេអ៊ែររបស់ទីក្រុងព្យុងយ៉ាងថា «កាន់តែមានភាពខ្លាំងឡើងៗពីមួយថ្ងៃទៅមួយថ្ងៃ»។

លោក គីម ត្រូវបានដកស្រង់សម្តីដោយទីភ្នាក់ងារសារព័ត៌មានរដ្ឋកូរ៉េ (KCNA) ដែលបាននិយាយថា៖ «ការធានាសន្តិភាព និងសន្តិសុខ ដោយកម្លាំងដ៏មានថាមពល គឺជារបៀបនៃការតស៊ូ និងជម្រើសរបស់យើង»។

ការទាមទាររបស់លោក គីម បានកើតឡើងតែប៉ុន្មានថ្ងៃប៉ុណ្ណោះ បន្ទាប់ពីប្រធានាធិបតីអាមេរិក លោក Donald Trump បង្ហាញឆន្ទៈក្នុងការភ្ជាប់ទំនាក់ទំនងឡើងវិញជាមួយមេដឹកនាំកូរ៉ខាងត្បូង ដោយនិយាយសំដៅដល់ប្រទេសឯកោមួយនេះថា ជា «មហាអំណាចនុយក្លេអ៊ែរ» ដោយសម្ដីនេះ គឺផ្ទុយស្រឡះពីគោលនយោបាយដ៏យូរអង្វែងរបស់ទីក្រុងវ៉ាស៊ីនតោន ក្នុងការបដិសេធមិនទទួលស្គាល់ស្ថានុយក្លេអ៊ែររបស់ទីក្រុងព្យុងយ៉ាង ដែលអ្នកវិភាគយល់ឃើញថា ជាលទ្ធភាពនៃការផ្លាស់ប្តូរ នៅក្នុងគោលការណ៍របស់សហរដ្ឋអាមេរិក៕