នៅក្នុងបទសម្ភាសន៍មួយ កាលពីថ្ងៃពុធ (ទី២៩ ខែមករា) ប្រមុខក្រុមប្រឹក្សាអឺរ៉ុប បាននិយាយថា អធិបតេយ្យភាពរបស់ប្រទេសដាណឺម៉ាក គឺជា «បញ្ហាសំខាន់» សម្រាប់សហភាពអឺរ៉ុប (EU) ខណៈដែលប្រធានាធិបតីសហរដ្ឋអាមេរិក លោក Donald Trump បន្តបង្ហាញចំណាប់អារម្មណ៍ ក្នុងការទាមទារដែនដី Greenland ឲ្យសហរដ្ឋអាមេរិកគ្រប់គ្រង។

កោះនៅតំបន់អាកទិកមួយនេះ គឺជាដែនដីពាក់កណ្តាលស្វយ័តរបស់ប្រទេសដាណឺម៉ាក។ ហើយប្រមុខក្រុមប្រឹក្សាអឺរ៉ុប លោក Antonio Costa បានប្រាប់សារព័ត៌មាន Euronews ថា «ដែនដីរបស់ប្រទេសដាណឺម៉ាក អធិបតេយ្យភាពរបស់ប្រទេសដាណឺម៉ាក និងស្ថិរភាពនៃព្រំដែនរបស់ប្រទេសនេះ គឺច្បាស់ជាបញ្ហាសំខាន់»។

ការអត្ថាធិប្បាយនេះ បានបន្ទរតាមសម្ដីរបស់ប្រមុខគោលនយោបាយការបរទេសរបស់សហភាពអឺរ៉ុប គឺលោកស្រី Kaja Kallas ដែលបាននិយាយថា ប្លុកនេះមិនចរចាបញ្ហាកោះ Greenland នោះទេ។

គួរបញ្ជាក់ថា លោក Trump បាននិយាយថា ដែនដី Greenland មានសារៈសំខាន់ ចំពោះសន្តិសុខរបស់សហរដ្ឋអាមេរិក ហើយប្រទេសដាណឺម៉ាកត្រូវតែបោះបង់ចោលការគ្រប់គ្រងលើកោះនៅតំបន់អាកទិកដ៏សំខាន់ជាយុទ្ធសាស្ត្រនេះ។ លោកក៏បានលើកឡើងផងដែរថា លោកមិនច្រានចោលការប្រើឥទ្ធិពលយោធា ឬសេដ្ឋកិច្ច ដើម្បីសម្រេចបានគោលដៅរបស់លោកនោះឡើយ៕