ប្រទេសរ្វ៉ាន់ដា ដែលអ្នកការទូតនិយាយថា គាំទ្រក្រុមសកម្មប្រយុទ្ធ M23 ដែលបានដណ្តើមកាន់កាប់ទីក្រុង Goma នៅសាធារណរដ្ឋប្រជាធិបតេយ្យកុងហ្គោ ក្នុងសប្តាហ៍នេះ បានអំពាវនាវ កាលពីថ្ងៃពុធ (ទី២៩ ខែមករា) ឲ្យមានបទឈប់បាញ់ នៅទូទាំងភាគខាងកើតកុងហ្គោ ហើយឲ្យប្រទេសកុងហ្គោចរចាជាមួយក្រុមឧទ្ទាម ខណៈដែលបានបដិសេធថា កងទ័ពរ្វ៉ាន់ដាមិនមានជាប់ពាក់ព័ន្ធនោះឡើយ។

រដ្ឋមន្ត្រីការបរទេសរ្វ៉ាន់ដា លោក Olivier Nduhungirehe បានប្រាប់សារព័ត៌មាន Reuters តាមទូរសព្ទថា ការប្រយុទ្ធគ្នា នឹងបញ្ឈប់នៅក្នុងទីក្រុង Goma ដោយខ្លួនឯង ព្រោះឥឡូវនេះ ទីក្រុងនេះត្រូវបានគ្រប់គ្រងដោយក្រុមឧទ្ទាម។ ប្រជាជនក្នុងទីក្រុង Goma បាននិយាយថា ការលួចប្លន់ និងការបាញ់កាំភ្លើងម្ដងម្កាល បន្តមាន កាលពីថ្ងៃពុធ។

លោកបាននិយាយថា៖ «ប៉ុន្តែប្រទេសរ្វ៉ាន់ដា គាំទ្រឲ្យមានបទឈប់បាញ់ នៅតំបន់ទាំងមូល (នៃភាគខាងកើតកុងហ្គោ) ហើយយើងគាំទ្រឲ្យមានការសន្ទនាដែលយើងបានស្នើជាយូរមកហើយ រវាងប្រទេសកុងហ្គោ និងក្រុម M23»។

គួរបញ្ជាក់ថា អង្គការសហប្រជាជាតិ សហរដ្ឋអាមេរិក បារាំង អង់គ្លេស និងកុងហ្គោ លើកឡើងថា រ្វ៉ាន់ដា គាំទ្រក្រុម M23 ហើយកងកម្លាំងរ៉្វាន់ដា បានជួយយុទ្ធជន M23 ដណ្តើមបានទីក្រុង Goma ដែលជាទីក្រុងដ៏ធំបំផុតនៅភាគខាងកើតប្រទេសកុងហ្គោ កាលពីថ្ងៃចន្ទ។

ប្រទេសរ៉្វ៉ាន់ដាបដិសេធថា កងកម្លាំងរបស់ខ្លួនមិនបានឆ្លងចូលទៅក្នុងប្រទេសកុងហ្គោនោះទេ ហើយពណ៌នាអំពីវិធានការយោធារបស់ខ្លួនថា ជាការការពារតែម្យ៉ាងប៉ុណ្ណោះ៕