ស្វាយរៀង ៖ លោក ញ៉ែម សារី អភិបាលរងខេត្តស្វាយរៀង បានស្នើដល់លោក លោកស្រី ជាថ្នាក់ដឹកនាំនៅគ្រប់គ្រឹះស្ថានសិក្សាត្រូវរួមគ្នាធ្វើការពិភាក្សាលើកចំណុចសំខាន់ៗក្នុងការបង្រៀននិងរៀនរបស់សិស្សដើម្បីស្វែងរកគុណភាពក៏ដូចជាកសាងធនធានមនុស្សឲ្យបានរឹងមាំ ដែលរាជរដ្ឋាភិបាលបានដាក់ចេញក្នុងគោលនយោបាយផែនការកសាងធនធានមនុស្សបន្តដឹកនាំនិងអភិវឌ្ឍន៍ជាតិនាពេលអនាគត។

ការថ្លែងនិងមានប្រសាសន៏របស់មន្ត្រីខេត្តបែបនេះ បានធ្វើឡើងក្នុងឱកាស លោកអញ្ជើញបើកសន្និបាតបូកសរុបលទ្ធផលការងារអប់រំឆ្នាំ២០២៤ និងលើកទិសដៅបន្តឆ្នាំ២០២៥ របស់មន្ទីរអប់រំយុវជននិងកីឡាខេត្តស្វាយរៀងថ្ងៃទី៣០ ខែមករាឆ្នាំ២០២៥ ដោយមានការចូលរួមពីសាស្ត្រាចារ្យ លោក គ្រូអ្នកគ្រូ នៅគ្រប់គ្រឹះស្ថានសិក្សាក្នុងខេត្ត និងលោក លោកស្រី ប្រធាន អនុប្រធានមន្ទីរអង្គភាពពាក់ព័ន្ធនិងអង្គការដៃគូប្រមាណជិត២០០នាក់ផងដែរ។ 

លោក ញ៉ែម សារី បានសំដែងអបអរសាទរចំពោះលទ្ធផលដែលក្នុងរយៈពេលមួយឆ្នាំសិក្សា២០២៤ សាស្ត្រាចារ្យ លោកគ្រូ អ្នកគ្រូ និងអង្គការដៃគូរ បានចូលរួមបង្ហាត់បង្រៀន និងឧបត្ថម្ភគ្រឿង​ឧបទ្ទេសសិក្សាដល់ គ្រឹះស្ថាន ពិសេសសិស្សានុសិស្ស ទទួល​បានលទ្ធផលល្អទៅតាមគោល​នយោបាយ​កសាងធនធានមនុស្ស តាមរយៈសម្រិតសម្រាងប្រលងប្រជែងរបស់បេក្ខជនជ័យលាភី សញ្ញាបត្រមធ្យមសិក្សាទុតិយភូមិ ជាង៧០%នៃចំនួនបេក្ខជនដាក់ពាក្យប្រឡងជាង ៤ពាន់នាក់។

 ដើម្បីឈានបន្តឆ្ពោះទៅចូលរួមអប់រំ ឱ្យមានគុណភាព ប្រសិទ្ធភាពបន្ថែម​លោក ញ៉ែម សារី បានស្នើដល់សមាជិក សមាជិកាអង្គសន្និបាតថ្ងៃនេះ ត្រូវធ្វើការពិភាក្សាឲ្យបានស៊ីជម្រៅបន្ថែមទៀត ដើម្បីស្រង់យកបទពិសោធន៍ល្អៗ យកទៅអនុវត្តបង្រៀនឲ្យមានប្រសិទ្ធិភាព ក្នុងការជំរុញអប់រំកុមារ​យុវជនធានាគុណភាព ដែលរាជរដ្ឋាភិបាលបានកំណត់នៅក្នុងផែនការយុទ្ធសាស្ត្រ​កសាងធនធាន​មនុស្សបន្តការពារ និងអភិវឌ្ឍន៍ជាតិពីបច្ចុប្បន្ន និងទៅអនាគត។